Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 259 Hüküm no: 217 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mano v. İstati’nin mumculuk sanatında ortağı olup ortaklıklarına son verdiği Yorgi v. Andreya’nın zimmetini ibra ettiği Mumcu tâifesinden olup mahmiye-i İstanbul’da Ayakapısı hâricinde Ahmed Çelebi mahallesinde sâkin Mano v. İstati nâm zimmî tarafından husûs-ı âti’z-zikri ikrâra vekîl olup Aslan Beşe b. Abdullah ve Mustafa Beşe b. Ali nâm kimesneler şehâdetleri ile şer‘an vekâleti sâbite olan Mustafa Çelebi b. İbrahim meclis-i şer‘-i hatîrde yine mahmiye-i mezbûrede zikrolunan Ayakapısı hâricinde vâki‘ mumhânede mumcu olan işbu râfi‘ü’s-sifr Yorgi v. Andreya nâm zimmî muvâcehesinde bi’l-vekâle ikrâr ve takrîr-i kelâm edip müvekkilim mezbûr Mano mezbûr Yorgi ile mumculuk san‘atında şerîkler olmağla fesh-i akd-i şirket eylediklerinde müvekkilim mezbûr Mano’nun mezbûr Yorgi zimmetinde re’s-i mâldan yirmi sekiz bin akçe hakkı zuhûr eyledikden sonra meblağ-ı mezbûrun bi’d-defe‘ât yirmi yedi bin beş yüz akçesini müvekkil-i mezbûr merkūm Yorgi yedinden ahz u kabz bâkī mezbûr Yorgi zimmetinde beş yüz akçe hakkı kalmışidi hâlâ meblağ-ı bâkī-i mezbûr beş yüz akçeyi dahi tamâmen mezbûr Yorgi yedinden ahz u kabz eyledi min ba‘d mezbûr Yorgi zimmetinde re’s-i mâlı olan meblağ-ı mezbûr yirmi sekiz bin akçeden ve gerek zamân-ı şirketlerinde hâsıl olan fâideden bir akçe ve bir habbe bâkī kalmadı eğer ba‘de’l-yevm husûs-ı mezbûra müte‘allika da‘vâ müvekkil-i mezbûrdan merkūm Yorgi üzerine sudûr ederse lede’l-hükkâm mesmû‘a olmasın dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İbrahim Efendi b. Gülabi el-imâm, el-Hâc Yusuf b. Abdullah, Süleyman b. Abdullah, Mehmed b. Abdullah, Yusuf b. Abdullah, Osman Beşe çukadâr, Mehmed Çelebi b. Haydar, İsa Bey b. Ahmed ve gayruhüm mine’l-[hâzırîn.]