Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 267 Hüküm no: 226 Orijinal metin no: [33a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havvâ adlı küçüğün evlatlık verildiği (Tebennî) Mahmiye-i Kostantıniyye mahallâtından Mi‘mâr Kemal mahallesinde sâkine olan Âişe bt. Ahmed nâm hâtun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe gelip, mahalle-i mezbûrede sâkin iken bundan akdem vefât eden Hâlil nâm zevcinden olma Havvâ nâm sagīre kızını yine mahalle-i mezbûrede sâkine olan Nihani bt. Hüseyin nâm hâtuna teslîm etti. O dahî tebennî, terebbî ve iyâle maksadıyla sagīre-i mezkûreyi teslîm aldı. Sonra hâkim-i muvakkı‘ a‘lâ hâze’l-kitâb bi-tevkî‘ihi’ş-şerîfi’l-müstetâb, mütebenniye-i mezkûrenin talebiyle, sagīre-i mezbûrenin nafakası, kisvesi ve sâir havâic-i zarûriyesi için alâ-men lehü’t-taleb, zeylde mezkûr tarihden itibaren yevmî râyicü’l-vakt beş akçe farz ve takdîr etti. Hâkim-i mûmâ-ileyh sonra meblağ-ı mefrûz-i mezbûru sagīre-i merkūmenin havâicine sarf etmeye ve vakt-i hâcetde istidâne edip vakt-i zaferde rücû‘ etmeye mezkûre Nihani’ye izin verdi. Cerâ zâlike ve hurrire fi’l-yevmi’s-sâbi‘ aşara min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi b. Salih el-kādî, Mehmed Efendi b. Veli Efendi el-kādî, Ali Bey b. Ahmed el-muhzır, Mehmed Çelebi b. Haydar, İbrahim Bey b. Abdullah ve gayrühüm