Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 267 Hüküm no: 227 Orijinal metin no: [33a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Ali Ağa’nın vakfettiği paradan Halil Çelebi b. Osman’ın aldığı paranın vakfa iadesine karar verildiği Mahmiye-i İstanbul’da Kırkçeşme kurbünde vâki‘ Sekbânbaşı İbrahim Ağa mahallesi sükkânından olup bundan akdem yeniçeri ağalığından ma‘zûlen vefât eden Kara Ali Ağa nâm sâhibü’l-hayrın vakfeylediği nukūdunun mütevellîsi olan Receb Efendi b. Ahmed meclis-i şer‘-i hatîrde işbu bâ‘isü’l-kitâb Halil Çelebi b. Osman mahzarında üzerine takrîr-i da‘vâ edip mezbûr Halil Çelebi’nin babası merkūm Osman kendi huzûrunda beher yevm bir Âmenerresûl kırâat ve sevâbını rûh-ı vâkıfa hibe edip ba‘de’l-vefât cihet-i mezbûrenin tevcîhi re’y-i hâkimü’l-vakte tefvîz eylediğini vâkıf-ı mezbûr vakfiye-i ma‘mûlün-bihâsında ta‘yîn ve tasrîh etmişiken merkūm Osman [33b] vefât etdikde oğlu mezbûr Halil Çelebi cihet-i mezbûreyi bilâ-berât hilâf-ı şart-ı vâkıf vakf-ı mezbûrun mütevellîsi olup bundan akdem tarîk-ı hacc-ı şerîfde vefât eden Hammâmî Ahmed Çelebi yedinden dokuz senede üç bin iki yüz kırk akçe vazîfe-i mu‘ayyeneyi ahz eylemişdir suâl olunup meblağ-ı mezbûrun vakf-ı mezkûr için bana alıverilmesin taleb ederim dedikde gıbbe’s-suâl mezbûr Halil Çelebi cevâbında fi’l-hakīka şart-ı vâkıf üzere babam mezbûr Osman cihet-i mezbûreye mutasarrıf olmağla ba‘de vefâtihî ben dokuz senede beher yevm bir Âmenerresûl bilâ-berât kırâat edip mütevellî-i sâbık-ı mezbûr Ahmed Çelebi yedinden mâl-ı vakf-ı mezbûrdan üç bin iki yüz kırk akçe ahz u kabz eyledim deyu cihet-i mezbûreyi bilâ-berât tasarrufunu tav‘an ikrâr ve i‘tirâf etmeğin ikrârı mûcebince bilâ-berât dokuz senede ahz u kabz ve ikrâr eylediği üç bin iki yüz kırk akçeyi mütevellî-i vakf-ı mezkûr Receb Efendi’ye vakf-ı mezkûr için red ve teslîme mezbûr Halil Çelebi’ye mahzarında tenbîh birle mâ-vaka‘a bi’t-taleb ketb olundu. Fi’l-yevmi’l-âşir min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abdurrahman Ağa el-mübâşir, Ömer Halîfe b. Abdullah el-müezzin, İsmail Halîfe b. Mehmed, Mehmed Beşe b. ( ) muhzır, Osman Beşe çukadâr ve gayruhüm mine’l-[hâzırîn.]