Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 269 Hüküm no: 229 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Mehmed’in Keçeci Piri mahallesindeki menzilinin yarısını annesi Ayşe bt. Hasan’a beş yüz guruşa sattığı Mahmiye-i İstanbul’da Sultân mahallesinde sâkin Mustafa Çelebi b. Mehmed nâm kimesne meclis-i şer‘-i hatîr-i lâzimü’t-tevkīrde vâlidesi olup mahmiye-i mezbûrede Keçeci Pîrî mahallesinde sâkine işbu hâfizetü’l-vesîka Âişe bt. Hasan nâm hâtun tarafından husûs-ı âti’z-zikri tasdîka vekîl olup mezbûrenin zâtını ma‘rifet-i şer‘iyye ile ârifân Bahşi b. Hızır ve İsmail b. Mehmed nâm kimesneler şehâdetleri ile şer‘an vekâleti sâbite olan İbrahim Çelebi b. Şa‘ban mahzarında ikrâr-ı tâm ve takrîr-i kelâm edip silk-i mülkümde olup zikrolunan Keçeci Pîrî mahallesinde vâki‘ bir tarafı bazen Medîne-i Münevvere fukarâsına meşrût vakıf menzile ve bazen Kazzâz Mustafa Çelebi b. ( ) mülkü ve bazen Hasan Bey b. Abdullah mülküne ve bir tarafı bazen yine Medîne-i Münevvere fukarâsına meşrût âhar menzile ve bazen Mustafa Çelebi b. Abdullah mülküne ve bir tarafı Kahraman bt. Abdullah mülküne ve bir tarafı tarîk-ı âmma müntehî muhavvateyni hâvî olup muhavvata-i dâhiliyyesi iki beyt-i ulvî ve iki beyt-i süflîyi ve bir sofayı ve üç su kuyusunu ve cüneyneyi ve kenîfi müştemil olup ve muhavvata-i hâriciyyesi bir beyt-i ulvî ve bir beyt-i süflîyi müştemil cemî‘ mülk menzilimin nısf-ı şâyi‘ini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile beş yüz kıt‘a riyâlî guruşa vâlidem müvekkilem mezbûre Âişe’ye bey‘ ve teslîm ol dahi vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr beş yüz riyâlî guruşun iki yüz kıt‘a riyâlî guruşunu vâlidem müvekkile-i mezbûre yedinden tamâmen ahz u kabz edip mâ‘adâ olan üç yüz riyâlî guruşdan vâlidem müvekkile-i mezbûrenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezbûrun nısf-ı şâyi‘i vâlidem müvekkile-i mezbûrenin mülk-i müşterâsıdır keyfemâ teşâ ve tahtâr mutasarrıfe olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Efendi b. Yusuf el-imâm, Mustafa Çelebi el-müezzin, İsmail Çelebi b. Hüseyin, Hasan b. İbrahim, Nurullah Efendi b. Abdullah, Seyyid Mehmed Çelebi b. Seyyid Ca‘fer, Seyyid Hanefi Çelebi, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]