Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 270 Hüküm no: 230 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yani v. Atnaş’ın tüfek ile dokunup gözünün berelenmesine sebep olan Terzi İstoyan v. Avram ile on altı guruşa sulh olduğu Mahmiye-i İstanbul’da Mahmud Paşa Hanı’nda sâkin olup kürkçü tâifesinden Yani v. Atnaş nâm zimmî meclis-i şer‘-i hatîrde derzi tâifesinden işbu râfi‘ü’s-sifr İstoyan v. Avram nâm zimmî muvâcehesinde bi’t-tav‘i’s-sâf ikrâr ve i‘tirâf edip târih-i kitâbdan iki ay mukaddem ordu-yı hümâyûn alayı günü mezbûr İstoyan elinde olan tüfengini alıp benim sağ gözüme dokunmağla gözüm berelenip mecrûh olmağın hâlâ mûcib-i şer‘îsini mezbûr İstoyan’dan da‘vâ ve taleb eylediğimde ol dahi inkâr etmekle beynimizde münâza‘ât-ı kesîre cereyânından sonra tavassut-ı muslihîn ile da‘vâ-i mezbûreden beni merkūm İstoyan on altı riyâlî guruş üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on altı guruşu mezbûr İstoyan yedinden tamâmen ahz u kabz edip husûs-ı mezbûra müte‘allika cemî‘ de‘âvî ve mutâlebât ve eymân ve muhâsamâtdan mezbûr İstoyan’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d husûs-ı mezbûra müte‘allika merkūm İstoyan ile bi-vechin mine’l-vücûh ve sebebin mine’l-esbâb da‘vâ ve nizâ‘ım kalmadı dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali Beşe çukadâr, Seyyid Ebûbekir Çelebi b. es-Seyyid Cemaleddin, Osman Beşe çukadâr, Mehmed Çelebi b. Haydar, İsa Bey b. Ahmed ve gayruhüm mine’l-[hâzırîn.]