Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 272 Hüküm no: 232 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fodula Katibi İbrahim Efendi’nin Abdülfettah Ağa b. Mahmud Ağa’da olan alacağını tahsil edip zimmetini ibra ettiği Mahmiye-i İstanbul’da Sarıgörez kurbünde Çıkrıkçı Kemal mahallesi sâkinlerinden olup hâlâ fodula kâtibi olan umdetü erbâbi’t-tahrîr ve’l-kalem İbrahim Efendi b. ( ) tarafından husûs-ı âti’z-zikri da‘vâ ve talebe ve ahz u kabza vekîl olup Halil Efendi b. Mustafa ve Ahmed Beşe b. Ali nâm kimesneler şehâdetleri ile şer‘an vekâleti sâbite olan Mehmed Beşe b. Ahmed nâm râcil meclis-i şer‘-i hatîr-i lâzimü’t-tevkīrde medîne-i Trabzon ahâlîsinden bâ‘isü’l-kitâb fahrü’l-akrân Abdülfettah Ağa b. Mahmud Ağa mahzarında bi’t-tav‘i’s-sâf ikrâr ve i‘tirâf edip müvekkilim mezbûr İbrahim Efendi bundan akdem mezbûr Abdülfettah Ağa ile yine medîne-i mezbûre ahâlîsinden gāib ani’l-meclis Peltek Ali nâm kimesneye yedinden ve malından bin kıt‘a riyâlî guruş ikrâz ve teslîm edip mezbûrân dahi iktirâz ve kabz etmeleri ile müvekkilim mezbûrun mezbûrân zimmetlerinde bin riyâlî guruş hakkı olmağla meblağ-ı mezbûrdan dokuz yüz guruşunu mukaddemâ müvekkilim mezbûr İbrahim Efendi ahz u kabz edip bâkī mezbûrân zimmetlerinde meblağ-ı mezkûrdan yüz guruş kalmışidi hâlâ ben dahi vekâletim hasebiyle meblağ-ı bâkī-i mezkûr yüz guruşdan merkūm Abdulbâki Ağa’nın hissesine isâbet edip zimmetine edâsı lâzım gelen elli guruşu dahi yedinden tamâmen ahzu kabz edip müvekkilim mezbûr İbrahim Efendi’nin meblağ-ı mezkûr bin kıt‘a riyâlî guruşdan merkūm Abdülfettâh Ağa zimmetinde bir akçe ve bir habbe hakkı bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi b. Salih el-kâtib, Osman Bey b. Abdullah el-yesârî, Receb Beşe b. Mehmed Üsküdarî an-mahalle-i Sultân, Mustafa b. Mahmud, Salih Mehmed Çelebi b. Musa Efendi, İsa Bey b. Ahmed ve gayruhüm mine’l-[hâzırîn.]