Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 273 Hüküm no: 233 Orijinal metin no: [34a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Parşo v. İsteryo’nun altmış guruş alacağını ödemek için Meyhaneci Hıristodori v. Todori’ye yüz altmış gün süre verdiği İstanbul’da mumcu tâifesinden Parşo v. İsteryo nâm zimmî meclis-i şer‘-i hatîrde meyhâneci tâifesinden Hıristodori v. Todori nâm zimmî muvâcehesinde ikrâr-ı tâm ve takrîr-i kelâm edip mezbûr Hıristodori zimmetinde cihet-i deyn-i şer‘îden yüz doksan guruş hakkım olup bundan akdem huzûr-ı hâkimü’ş-şer‘de mezbûr Hıristodori’den da‘vâ ve taleb eylediğimde ol dahi cevâbında zimmetinde bana yüz yirmi riyâlî guruş deyni olduğunu ikrâr ve ziyâde yetmiş riyâlî guruşu inkâr etmekle mûcibiyle ziyâde olan meblağ-ı mezbûr yetmiş riyâlî guruşu isbât için bana mehl-i şer‘î verildikden sonra mezbûr Hıristodori’nin ikrârı mertebesi olan meblağ-ı mezbûr yüz yirmi riyâlî guruşu bana edâ ve teslîme mezbûr Hıristodori’ye tenbîh olunmuşidi hâlâ meblağ-ı mezbûr [yüz] yirmi riyâlî guruşun altmış riyâlî guruşu mezbûr Hıristodori bana edâ ve teslîm ben dahi ba‘de’l-ahz ve’l-kabz meblağ-ı bâkī altmış guruşu dahi târih-i kitâbdan yüz altmış gün tamâmına değin mezbûr Hıristodori’ye te’cîl eylediğimde ol dahi ecel-i mezbûru kabûl eyledi dedikde mukırr-ı mezbûru vech-i meşrûh üzere cârî olan ikrârında merkūm Hıristodori bi’l-müvâcehe tasdîk ve bi’l-müşâfehe tahkīk eyledikden sonra mezbûr Hıristodori’nin zimmetinde bâkī kalan meblağ-ı müeccel-i mezbûr altmış riyâlî guruşa mahmiye-i İstanbul’da hısnı ebvâbından Narlıkapı hâricinde vâki‘ meyhânede meyhâneci olan Atanaş v. Tayfara nâm zimmî emr ve kabûlü hâviye kefâlet-i sahîha-i şer‘iyye ile kefîl olmağın mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed b. Ramazan, İbrahim b. Ali, Osman Beşe çukadâr, Mehmed Çelebi b. Haydar, İsa Bey b. Ahmed, İsmail b. Yunus, Süleyman Bey el-muhzır ve gayruhüm mine’l-[hâzırîn.]