Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 273 Hüküm no: 234 Orijinal metin no: [34a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Kurd’un Aydın Kethüdâ mahallesindeki menzilini Ahmed Çelebi b. Osman’a yirmi yedi bin beş yüz akçeye sattığı Mahmiye-i İstanbul’da Aydın Kethüdâ mahallesinde sâkine Âmine bt. Kurd nâm hâtunun zevci ve tarafından menzil-i âti’l-beyânı bey‘a ve semenini kabza vekîli olup mezbûreyi ma‘rifet-i şer‘iyye ile ârifân olan Hüseyin Çelebi b. Hüsrev el-müezzin ve Muslı Beşe b. Halil şehâdetleri ile şer‘an vekâleti sâbite olan Arslan b. Abdullah meclis-i şer‘-i hatîr-i lâzimü’t-tevkīrde işbu râfi‘ü’l-kitâb Ahmed Çelebi b. Osman mahzarında bi’l-vekâle ikrâr ve takrîr-i kelâm edip müvekkile-i mezbûre Âmine Hâtun’un zikri âtî akdin sudûruna değin silk-i mülkünde muntazam mülk ve hakkı olup mahalle-i mezkûrede vâki‘ bir tarafdan Osman b. Abdullah mülküne ve bir tarafdan bazen Dilaver Bey b. Abdullah mülküne ve bazen Hasan Beşe b. Abdullah mülküne ve bir tarafdan Medîne-i Münevvere Vakfı ve bir tarafdan tarîk-ı âmma müntehî olup [34b] iki bâb beyt-i ulvî ve bir beyt-i süflîyi ve bir sofayı ve bir su kuyusunu ve tahta-pûşu ve cüneyne ve kenîfi müştemil cemî‘ mülk menzilini kâffe-i hukūk ve merâfıkıyla mezbûr Ahmed Çelebi’ye vekâletim hasebiyle yirmi yedi bin beş yüz fıddî râyic fi’l-vakt akçeye tarafeynden îcâb ve kabûlü hâvî bey-i bâtt-ı sahîh ile bey‘ ve teslîm ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezkûr yirmi yedi bin akçeyi mezbûr Ahmed Çelebi yedinden vekâletim hasebiyle bi’t-tamâm ahz u kabz eyledim ba‘de’l-yevm menzil-i mahdûd-ı mezkûr merkūm Ahmed Çelebi’nin mülk-i müşterâsı ve hakk-ı sırfıdır mutasarrıf olsun dedikde vekîl-i mezbûr Arslan vech-i meşrûh üzere cârî ve sâdır olan ikrârında el-mukarru lehü’l-mezkûr Ahmed Çelebi vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ebûbekir Efendi el-imâm, Siyavuş Bey el-bevvâb, Mahmud Çelebi b. Mehmed el-müezzin, Pîrî Bey b. Abdullah, Salih b. Pîr Sâbit, Ramazan Çelebi b. Abdullah, Muslı Çelebi b. Halil el-attâr, Osman Bey el-cündi, Şa‘ban Beşe b. ( ) ve gayruhüm mine’l-[hâzırîn.]