Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 274 Hüküm no: 235 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Yani’nin on yedi bin dört yüz akçe alacak iddiasını inkar eden Yorgi v. Kosta’ye yemin ettirildiği Havâss-ı aliyye kazâsı muzâfâtından kasaba-i Çatalca sükkânından Yorgi v. Yani nâm zimmî meclis-i şer‘-i hatîr-i lâzimü’t-tevkīrde yine kasaba-i mezbûrede sâkin işbu bâ‘isü’s-sifr Yorgi v. Kosta nâm zimmî muvâcehesinde üzerine da‘vâ ve takrîr-i kelâm edip târih-i kitâbdan üç sene mukaddem kasaba-i mezbûrede malımdan mezbûr Yorgi’ye on yedi bin dört yüz akçe ikrâz ve teslîm ol dahi vech-i muharrer üzere yedimden iktirâz ve kabz eyleyip hâlâ taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘î-i mezbûr yedinden târih-i mezbûrda meblağ-ı mezbûr on yedi bin dört yüz akçe iktirâz ve kabz etmeyip ol vechile meblağ-ı mezbûr müdde‘î-i merkūm zimmetinde reddi ve teslîmi vâcib değil idiğine mezbûr Yorgi v. Kosta’ya yemîn teklîf olundukda ol dahi hasbe’l-mes’ûl yemîn billâhi’l-lezî enzele’l-İncîle alâ İsa aleyhisselâm etmeğin mûcibiyle müdde‘î-i mezbûr bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa b. Abdullah, Mustafa Çavuş el-mübâşir, Osman Beşe çukadâr, Mehmed b. Haydar, İsa Bey b. Ahmed ve gayruhüm mine’l-[hâzırîn.]