Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 275 Hüküm no: 236 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey b. Veli’nin Avanos v. Mardoros’tan on beş bin akçe alacağı olduğu Budur ki mahmiye-i İstanbul’da vâki‘ merhûm ve mağfûrun-leh Sultân Süleyman Hân aleyhi’r-rahmetü ve’l-gufrân hazretlerinin evkāfı mütevellîsi olan mefharü’l-emâsil ve’l-a‘yân Ebûbekir Ağa’nın etbâ‘ından olan sâhibü hâze’l-kitâb Hasan Bey b. Veli meclis-i şer‘-i hatîr-i lâzimü’t-tevkīrde kayıkçı tâifesinden olan Avanos v. Mardoros nâm Ermeni mahzarında üzerine da‘vâ ve takrîr-i kelâm edip evkāf-ı mezbûre mukāta‘âtından olup Hayrabolu kazâsına tâbi‘ Emiryakub demekle ma‘rûf mukāta‘anın işbu bin altmış yedi senesinde emîni olan Hasan Ağa üzerinde sene-i mezbûreye mahsûb olmak üzere vakf-ı mezbûr malından olan on beş bin akçeyi emîn-i merkūmdan ahz u kabza mütevellî-i mûmâ-ileyh beni tevkîl ve irsâl etmekle ben dahi varıp meblağ-ı mezbûru merkūm Hasan Ağa’dan bi’l-vekâle ahz u kabz edip medîne-i Ruscuk İskelesi’nde merkūm Avanos’un kayığına bindiğimde meblağ-ı mezbûr on beş bin akçeyi heğbe ile mezbûr Avanos’a teslîm edip mezbûr dahi ahz u kabz ve kayığının başüstü demekle ma‘rûf mevzi‘ine vaz‘ etmişiken mezbûrdan taleb eylediğimde inkâr etmekle işbu mâh-ı Şevvâl’in onuncu günü medîne-i mezbûrede nâibü’ş-şer‘i’ş-şerîf olan Mevlânâ Ali Efendi b. İbrahim huzûrunda merkūm Avanos ile murâfa‘a-i şer‘-i şerîf olup meblağ-ı mezbûru heğbe ile merkūm Avanos’a teslîmi şühûd-ı udûl ile nâib-i mûmâ-ileyh huzûrunda merkūm Avanos muvâcehesinde vech-i şer‘î üzere isbât ettiğimde nâib-i mûmâ-ileyh dahi beyyinemi istimâ‘ ve kabûl ve mezbûr Avanos’un inkârı te‘addî olmağla meblağ-ı mezbûru zamânına merkūm Avanos üzerine muvâcehesinde hüküm ve yedime hüccet-i şer‘iyye vermiş iken merkūm Avanos meblağ-ı mezbûru edâda ta‘annüd eder suâl olunup meblağ-ı mahkûmün-bih-i mezkûrun merkūm Avanos’dan alıverilmesini taleb ederim deyu târih-i mezbûr ile müverraha ve mevlânâ-yı mezbûrun imzâsıyla mümzât ve hatemi ile mahtûme ve meblağ-ı mezbûr on beş bin akçeyi merkūm Avanos’un müdde‘î-i mezbûr Hasan Bey’e zamanına hükmünü hâviye hüccet-i şer‘iyye ibrâz edip merkūm Avanos muvâcehesinde feth u kırâat ve istintâk olundukda cevâbında fi’l-hakīka müdde‘î-i mezbûr Hasan Bey ile meblağ-ı mezbûr için nâib-i mûmâ-ileyh huzûrunda murâfa‘a-i şer‘-i şerîf olunduklarında nâib-i mûmâ-ileyh mezbûr Hasan Bey’in şühûdunu istimâ‘ ve kabûl ve meblağ-ı mezbûrun ba‘de’l-hükm yedine hüccet-i şer‘iyye verildiğini tav‘an ikrâr ve i‘tirâf edicek merkūm Avanos’un i‘tirâfı mûcebince meblağ-ı mezbûru müdde‘î-i merkūma edâya merkūm Avanos muvâcehesinde üzerine ilzâm-ı sahîh-i şer‘î kılınıp mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abdi Beşe b. Ramazan, Mustafa Çelebi b. Mahmud, Hüseyin b. İbrahim, Çukadâr Osman Beşe, İsa Bey b. Ahmed, İsmail Çelebi b. Yunus, Mehmed Çelebi b. Haydar ve gayruhüm mine’l-[hâzırîn.]