Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 276 Hüküm no: 237 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Şehri v. Marat’ın terekesi hususunda amcası oğlu ve varisi olan İskender b. Nurihan’a daha önce ölen amcası oğulları Pastör’ün kızı Meryem ile Sefer’in kızı diğer Meryem’in müdahalelerinin engellenmesi Mahmiye-i İstanbul’da Sulumanastır mahallesinde sâkin iken hâlik olan Şehri v. Marat nâm Ermeni zimminin verâseti zevce-i metrûkesi Şehzede bt. ( ) nâm Ermeniye’ye ve li-ebeveyn ibn-i ammi kendinden evvel hâlik olan Nurihan’ın sulbî kebîr oğlu İskender’e münhasıra olduğu şer‘an mütehakkık ve tereke-i hâlik-i mezbûr dört sehm i‘tibâr olunup sihâm-ı mezkûreden bir sehmi zevce-i mezbûre Şehzede’ye ve üç sehmi ibn-i ammi ve usûbet-i nesebiyye cihetinden vârisi olan mezbûr İskender’e isâbet eylediği zâhir ve mütebeyyin oldukdan sonra mezbûr İskender meclis-i şer‘-i hatîr-i lâzimü’t-tevkīrde hâlik-i mezbûr Şehri’nin li-ebeveyn ibn-i ammi olup kendiden evvel hâlik olan Sefer’in sulbiye kebîre kızı Meryem nâm Ermeniye ve diğer ibn-i ammi olup yine kendiden evvel hâlik olan Pastör’ün sulbiye kebîre kızı diğer Meryem nâm Ermeniye mahzarında üzerlerine takrîr-i da‘vâ edip ammim hâlik-i mezbûrun terekesinin rub‘u zevcesi mezbûre Şehzede’ye ve selâse-i erbâ‘ı bi-hasebi’l-irsi’ş-şer‘î bana isâbet etmişiken merkūmetân Meryem ve diğer Meryem biz dahi hâlik-i mezbûr Şehri’nin vârisesiyiz deyu bi-hasebi’l-irs bana isâbet eden selâse-i erbâ‘ hisse-i şer‘iyyeme nâ-hak vaz‘-ı yed eder suâl olunup tereke-i hâlik-i mezbûrdan kasr-ı yedlerine cânib-i şer‘den tenbîh olunması matlûbumdur dedikde gıbbe’s-suâl merkūmetân Meryem ve diğer Meryem cevâblarında müdde‘î-i mezbûr İskender hâlik-i mezbûr Şehri’nin ibn-i ammi ve usûbet-i nesebiyye cihetinden vârisi [35a] olduğunu herbiri tâyi‘aten ikrâr ve i‘tirâf edicek tereke-i hâlik-i mezbûrdan kasr-ı yedlerine ve mezbûr İskender’e bi-gayri vech-i şer‘î ta‘arruzdan men‘a cânib-i şer‘den tenbîh birle mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, İsmail Çelebi b. Yunus, Osman Beşe çukadâr, Mehmed Çelebi b. Haydar, Süleyman Bey b. Abdullah ve gayruhüm mine’l-[hâzırîn.]