Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 277 Hüküm no: 238 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Musul Beylerbeyi Şahar Paşa b. Abdurrahman’ın alacak hususunda Mehmed Ağa b. Derviş ile iki yüz elli guruşa sulh olduğu Fazîletli efendi hazretlerinin imzâsıyladır. Sâbıkā Musul beylerbeyisi olan emîrü’l-ümerâ’i’l-kirâm kebîru’l-küberâ’i’l-fihâm zû’l-kadri ve’l-ihtirâm Şahar Paşa b. Abdurrahman meclis-i şer‘-i hatîrde ağalarından işbu râfi‘ü’l-kitâb Mehmed Ağa b. Derviş mahzarında ikrâr ve i‘tirâf edip bin altmış beş senesinde Musul beylerbeyiliği bana ihsân oldukda Eyâlet-i Musul’da vâki‘ keferenin cizyesini dahi cem‘a bin altmış altı senesine mahsûb olmak üzere me’mûr olduğumda mezbûr Mehmed Ağa’ya dokuz bin kıt‘a riyâlî guruşa deruhde edip ol dahi iltizâm ve kabûl ve ba‘dehû cem‘ ve tahsîl ve bi’d-defe‘ât kıst-ı iltizâmından sekiz bin beş yüz elli altı kıt‘a riyâlî guruşu bana teslîm edip üzerinde dört yüz kırk dört riyâlî guruş kalmağla taleb ve da‘vâ eylediğimde beynimizde münâza‘ât-ı kesîre cereyânından sonra vesâtat-ı muslihîn ile da‘vâ-yı mezbûremden mezkûr Mehmed Ağa benimle iki yüz elli kıt‘a riyâlî guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i mezbûru yedinden tamâmen ahz u kabz mâ‘adâdan zimmetini ibrâ-i âm ile ibrâ eyledim min ba‘d husûs-ı mezbûra müte‘allika cemî‘ de‘âvî ve mutâlebât ve eymân ve muhâsamâtdan mezbûr Mehmed Ağa’yı ibrâ edip vechen mine’l-vücûh ve sebeben mine’l-esbâb kıbelinde hakkım kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İvaz Ağa ser-muhzırân, Mahmud Ağa b. Abdürrahim, İsa Bey b. Ahmed, Ahmed Bey b. Abdurrahman, Mustafa Bey ve gayruhüm mine’l-[hâzırîn.]