Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 279 Hüküm no: 240 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkis v. Bedrik’in terekesi hususunda teyzesi Temam’ın kırk beş guruş üzerine karısı Meryem ile sulh olduğu Medîne-i Üsküdar’da Yenimahalle’de sâkin iken hâlik olan Serkis v. Bedrik nâm Ermeni zimmînin verâseti zevce-i metrûkesi Meryem nâm Ermeniye’ye ve anası olup kendiden evvel hâlike olan Köni nâm Ermeniyenin li-ebeveyn kız karındaşı ve zî-rahm cihetinden vârisesi olan Temam nâm Ermeniye’ye münhasıra olduğu tereke-i hâlik-i mezbûra zevcesi mezkûre Meryem vâzı‘atü’l-yed olduğu şer‘an mütehakkık oldukdan sonra mezkûr Temam meclis-i şer‘-i hatîr-i lâzimü’t-tevkīrde mezbûre Meryem muvâcehesinde bi-tav‘ihâ ikrâr ve i‘tirâf edip mûrisimiz hâlik-i mezbûr Serkis’in terekesinin rub‘u zevcesi mezkûre Meryem’e ve selâse-i erbâ‘ı bi-hasebi’l-irsi’ş-şer‘î bana isâbet etmeğin ben dahi tereke-i hâlik-i mezbûrdan benim hisseme isâbet eden selâse-i irbâ‘ hakkımı tereke-i hâlik-i mezbûra vâzı‘atü’l-yed olmağla zevcesi mezbûre Meryem’den da‘vâ ve taleb etmekle beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip tereke-i hâlik-i mezbûrdan selâse-i irbâ‘ hisse-i şer‘iyyem mukābilesinde şerâit-i sulhu câmi‘ ve mevâni‘den ârî tehârüc-i şer‘î tarîkı üzere kırk beş riyâlî guruş üzerine sulh ettiklerinde ben dahi sulh-ı mezkûru kabûl edip bedel-i sulh olan kırk beş riyâlî guruşu tereke-i hâlik-i mezbûrdan mezbûre Meryem yedinden tamâmen ahz u kabz eyleyip tereke-i hâlik-i mezbûrdan zevcesi mezbûre Meryem’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm tereke-i hâlik-i mezbûra müte‘allik zevcesi mezkûre Meryem üzerine bi-vechin mine’l-vücûh ve sebebin mine’l-esbâb da‘vâ ve hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Arslan Çavuş b. Mustafa, Çukadâr Osman Beşe, İsa Bey b. Ahmed, İsmail Çelebi b. Yunus, Mehmed Çelebi b. Haydar ve gayruhüm mine’l-[hâzırîn.]