Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 279 Hüküm no: 241 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Avanis v. Sihak’ın Çoban Çavuş mahallesindeki menzilini çocukları Agop, Haçador ve Zümrüd’e bin guruşa sattığı Zikri âtî husûsun mahallinde tahrîri iltimâs olunmağın savb-ı şer‘-i enverden Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da Çoban Çavuş mahallesinde sâkin kuyumcu tâifesinden Avanis v. Sihak nâm Ermeni’nin menziline varıp zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i hatîr etdikde merkūm Avanis meclis-i ma‘kūd-ı mezbûrda sulbî kebîr oğulları Agop ve Haçador nâm Ermeniler ile sulbiye kebîre kızı Zümrüd nâm Ermeniye mahzarında tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan zevcem Melek bt. İsador nâm Ermeniye mülküne ve bir tarafdan Mina bt. Muradça nâm Ermeniye mülküne ve bir tarafdan Balıkçı Marat nâm Ermeni mülküne ve bir tarafdan tarîk-ı âmma müntehî olup biri tahtânî ve bir fevkānî iki bâb odaları ve önünde dehlîzi ve mukābilesinde bir ulvî odayı ve iki bâb vüstânî odayı ve bir sofayı ve iki dehlîzi ve bir su kuyusunu ve kenîfi ve havluyu müştemil olan cemî‘ mülk menzilin beş sehimden ikişer sehm-i şâyi‘lerini oğullarım mezbûrân Agop ve Haçador’a ve bir sehm-i şâyi‘ini kızım merkūme Zümrüd’e tarafeynden îcâb ve kabûlü hâvî bey‘-i bât ile bin riyâlî guruşa bey‘ ve teslîm edip merkūmûn dahi iştirâ ve kabûl ve tesellüm ettiklerinden sonra semen-i merkūmdan zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d cemî‘ menzil-i merkūm kâffe-i hukūk ve merâfıkı ile minvâl-i meşrûh üzere ikişer sehm-i şâyi‘i oğullarım mezbûrânın ve bir sehm-i şâyi‘i kızım mezbûrenin mülk-i müşterâlarıdır keyfemâ yeşâ’ûn ve yahtârûn mutasarrıf olsun[lar] dedikde mukırr-ı mezbûru vech-i meşrûh üzere cârî ve sâdır olan ikrârında el-mukarru lehümü’l-mezbûrûn dahi bi’l-müvâcehe tahkīk ve bi’l-müşâfehe tasdîk eylediklerinde vâki‘-i hâli mevlânâ-yı mezbûr mahallinde tahrîr ve ba‘dehû meclis-i şer‘-i hatîre gelip vukū‘u üzere ihbâr ve takrîr edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-Şa‘bâni’l-mu‘azzam li-sene seb‘a ve sittîn ve elf. Şühûdü’l-hâl: Halil Çavuş b. Abdülmennân, Berber Üstâd Mahmud b. Bayezid, Sefer Beşe b. Abdullah, Attâr Hasan b. Abdullah, Ahmed b. Abdullah.