Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 285 Hüküm no: 248 Orijinal metin no: [36a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdülkadir b. es-Seyyid İsmail’in Rus asıllı cariyesi Gülahmer’i oğlu Seyyid Mehmed Çelebi’ye elli guruşa sattığı Mahmiye-i İstanbul’da Gül Câmi‘i mahallesi ahâlîsinden es-Seyyid Abdülkadir b. es-Seyyid İsmail meclis-i şer‘-i hatîr-i lâzimü’t-tevkīrde sulbî kebîr oğlu es-Seyyid Mehmed Çelebi mahzarında tav‘an ikrâr ve i‘tirâf edip bundan akdem oğlum mezbûr Mehmed Çelebi’ye silk-i mülkümde muntazam evsâfı beynimizde ma‘lûme Rusiyyetü’l-asl Gülahmer nâm memlûke câriyeyi elli riyâlî guruşa bey‘ ve teslîm edip minvâl-i muharrer üzere iştirâ ve tesellüm eyledikden sonra semeni olan meblağ-ı mezkûr elli riyâlî guruşu oğlum mezbûr es-Seyyid Mehmed Çelebi yedinden tamâmen ahz u kabz eyledim ba‘de’l-yevm zikrolunan câriye oğlum mezbûr es-Seyyid Mehmed Çelebi’nin mülk-i müşterâsı ve hakk-ı sırfıdır dedikde mukırr-ı mezbûr es-Seyyid Abdülkadir Çelebi’yi minvâl-i meşrûh üzere cârî ve sâdır olan ikrârında el-mukarru lehü’l-mezkûr es-Seyyid Mehmed Çelebi vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Es-seyyid Mustafa Çelebi b. es-Seyyid Mehmed, el-Hâc Osman b. Mehmed, Salih Efendi b. Kurd, el-Hâc Halil b. Nasuh, Mehmed Beşe b. el-Hâc Mehmed, Osman Beşe çukadâr ve gayruhüm mine’l-[hâzırîn.]