Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 292 Hüküm no: 254 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Haraçcısı Ahmed Ağa b. Mehmed’in yeniçerileri odalarının dördüncü cemaatine mahsus para vakfına on yedi kese akçe borcu olduğunu ikrar ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i mutahhardan Mevlânâ Salih Efendi b. Salih irsâl olunup ol dahi mahmiye-i İstanbul’da Sinan Paşa mahallesi ahâlîsinden olup sâbıkā Bağdad ağası olan umdetü’l-emacid ve’l-ekârim zübdetü’l-mehâmid ve’l-mekârim Haseki Ali Ağa b. Ahmed’in menziline varıp zeyl-i kitâbda isimleri mastûr olan Müslimîn huzûrunda akd-i meclis-i şer‘-i şerîf eyledikde mahmiye-i mezkûrede Sancakdâr Hayreddin mahallesi ahâlîsinden olup hâlâ Ermeni harâccısı olan fahrü’l-akrân Ahmed Ağa b. Mehmed meclis-i ma‘kūd-ı mezkûrda Dergâh-ı âlî dâme mahfûfen bi’l-me‘âlî yeniçerileri odalarından dördüncü cemâ‘atine mahsûs olan odanın derûnu için mevkūfe nukūduna bi’l-fi‘il mütevellî olan mûmâ-ileyh Ali Ağa mahzarında bi-tav‘ihî ikrâr ve i‘tirâf edip vakf-ı mezbûr malından mütevellî-i mûmâ-ileyh Ali yedinden istikrâz ve kabz eylediğim her kîsesi kırkar bin akçe olmak üzere on altı kîse fıddî râyic fi’l-vakt akçe ve semeni târih-i kitâbdan bin altmış sekiz Ramazânı gurresine müeccel mütevellî-i mûmâ-ileyh yedinden müşterâ ve makbûz on zirâ‘ beynimizde ilm-i şer‘î ile ma‘lûm çuka bahâsından dahi kırk bin akçe olmak üzere bir kîse ki cem‘an meclis-i mezkûrda müşârun-ileyh olan on yedi kîse fıddî râyic fi’l-vakt akçe vakf-ı mezkûra zimmetimde lâzimü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î işbu hâzırûn bi’l-meclis olup Dergâh-ı âlî yeniçerilerinden altmışıncı müteferrikalarından mahmiye-i mezkûrede Murad Paşa mahallesi ahâlîsinden el-Hâc Hasan Beşe b. Hüseyin ve mahmiye-i mezkûrede Sancakdâr Hayreddin mahallesi sükkânından olup ebnâ-i sipâhiyândan Mustafa Bey b. Abdullah ve Şahbaz Bey b. Abdullah nâm kimesneler zikrolunan on yedi kîse akçenin mecmû‘una ale’s-seviyye emr ve kabûlü hâviye kefâlet-i sahîha-i şer‘iyye ile kefîl olduk dediklerinde vâki‘-i hâli mevlânâ-yı mezbûr mahallinde tahrîr edip ba‘dehû meclis-i şer‘a gelip vukū‘u üzere takrîr ve inhâ etmeğin mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: El-hâc Osman b. Ali vekîl-i odabaşı, el-Hâc Hüseyin Çelebi kethüdâ-yı Sarachâne, Salih Çelebi b. Mehmed 6. bölük, Yusuf Çavuş b. Abdünnebi 7. bölük, Ali Ağa b. Rüstem el-cündi, Ali Ağa b. Mustafa el-cündi, Kâtib Mehmed Çelebi b. Abdülhekim, Kasım Çelebi b. Ahmed çorbacı, Ahmed Ağa b. Abdullah yayabaşı, İbrahim Beşe b. Hasan, Hüseyin Beşe b. Mehmed, Salih Çelebi b. Şeyhî Efendi, Kadri Beşe er-râcil.