Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 293 Hüküm no: 255 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Ahmed’in yeniçerilerin dördüncü cemaatine mahsus para vakfına olan on üç kese akçe borcunu ödediği Husûs-ı âti’l-beyânın mahallinde tahrîri iltimâs olunmağın savb-ı şer‘-i mutahhardan Mevlânâ Salih Efendi b. Salih irsâl olunup ol dahi mahmiye-i İstanbul’da Sinan Paşa mahallesi ahâlîsinden olup sâbıkā Bağdad ağası olan umdetü’l-emâcid ve’l-ekârim zübdetü’l-mehâmid ve’l-mekârim Ali Ağa b. Ahmed’in menziline varıp zeyl-i kitâbda isimleri mastûr olan Müslimîn huzûrunda akd-i meclis-i şer‘-i şerîf etdikde Dergâh-ı âlî dâme mahfûfen bi’l-me‘âlî yeniçerilerinin dördüncü cemâ‘atine mahsûs olan odanın derûnu için mevkūfe nukūda bi’l-fi‘il mütevellî olan mûmâ-ileyh Ali Ağa meclis-i ma‘kūd-ı mezkûrda hâlâ Ermeni harâccısı olan fahrü’l-emâsil ve’l-akrân Ahmed Ağa b. Mehmed mahzarında tav‘an ikrâr ve i‘tirâf edip mûmâ-ileyh Ahmed Ağa’nın mâl-ı vakf-ı mezbûrdan bin altmış altı Ramazân-ı şerîfi gurresinden zikrolunan dördüncü cemâ‘atin odabaşısı olup gāib ani’l-meclis olan el-Hâc Bayezid Beşe b. Abdullah yedinden istikrâz ve kabz eylediği herbir kîsesi kırkar bin akçe olmak üzere on üç kîse fıddî râyic fi’l-vakt akçeyi hâlâ tevliyetim hasebiyle mûmâ-ileyh Ahmed Ağa yedinden bi’t-tamâm ahz u kabz eyledim dedikde mütevellî-i mûmâ-ileyh Ali Ağa vech-i muharrer üzere cârî ve sâdır olan ikrârında el-mukarru lehü’l-mezkûr Ahmed Ağa bi’l-müvâcehe tasdîk ve bi’l-müşâfehe tahkīk, vâki‘-i hâli mevlânâ-yı mezbûr mahallinde tahrîr edip ba‘dehû gelip meclis-i şer‘de alâ vukū‘ihî takrîr ve inhâ etmeğin mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: es-Sâbıkūn.