Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 293 Hüküm no: 256 Orijinal metin no: [37b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahhuban mahallesinde kendisine namahrem üç kadınla oturan Mehmed b. Hüseyin’in ahalinin talebiyle mahalleden ihracına karar verildiği Mahmiye-i İstanbul’da Zeyrek kurbünde Şahhuban mahallesi ahâlîsinden Ali Efendi b. el-Hâc Hüseyin el-imâm ve el-Hâc Hanifi b. İsmail ve el-Hâc Abdülcelil b. Ali ve İbrahim Çelebi b. el-Hâc Ali ve Mustafa b. Ramazan ve el-Hâc Mehmed b. el-Hâc Habib ve Ali Bey b. Murtaza ve Mehmed Çelebi b. Muslı ve diğer Mehmed Çelebi b. Ali ve İbrahim Beşe b. Hasan ve el-Hâc Ali b. Ahmed ve el-Hâc Habib b. Mehmed ve el-Hâc Bâli b. Mustafa nâm kimesneler bi-ecma‘ihim meclis-i şer‘-i hatîr-i lâzimü’t-tevkīrde mahalle-i mezbûrede sâkin Mehmed b. Hüseyin nâm kimesne mahzarında herbiri takrîr-i kelâm ta‘bîr-i meram edip mezbûr Mehmed’in mahallemizde sâkin olduğu menzil zevcesi ile kız karındaşlarının bi’l-iştirâk babalarından intikāl-i âdî ile müntakil menzilleri olmağla mezbûr Mehmed zevcesi ile ve zevcesinin kız karındaşları olup kendiye nâ-mahrem olan üç hâtun ile ma‘an sâkinler olup her bâr mezbûr Mehmed’e zevcen ile başka menzilde sâkin ol deyu tenbîh eylediğimizde mütenebbih olmayıp kendiye nâ-mahrem olan üç hâtun ile sâkin olmağın hâlâ mezbûr Mehmed mahallemizden ihrâc olunup âhar mahalleye nakl etmeğe mezbûr Mehmed’e tenbîh olunmak matlûbumuzdur dediklerinde fi’l-hakīka mezbûr Mehmedin sâkin olduğu menzilinde kendiye nâ-mahrem olan hâtunlar olup ve kendinin dahi nâ-mahremden adem-i tehâşîsi zâhir ve mütebeyyin olmağın mûcibiyle mezbûr Mehmed’e mahalle-i mezbûreden çıkıp âhar mahalleye nakl etmek için tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, İbrahim Bey b. Ömer, İsa Bey b. Ahmed, Mehmed b. Haydar ve gayruhüm mine’l-[hâzırîn.]