Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 294 Hüküm no: 257 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi v. İlya’nın alacak hususunda Bünyamin v. Peres ve kardeşi Heider’in zimmetini ibra ettiği Medîne-i Galata muzâfâtından Beşiktaş’a tâbi‘ Ortaköy nâm karyeden olup bundan akdem İngiliz tüccarından Perle nâm müste’men tarafından beynlerinde ma‘lûm emti‘asını bey‘ için dellâlı olan Kedüz cemâ‘atinden Mosi v. İlya nâm Yahudi meclis-i şer‘-i hatîr-i lâzimü’t-[tevkīrde] medîne-i Galata’da tüccâr tâifesinden olup Zeytun cemâ‘atinden Bünyamin v. Peres ve li-ebeveyn karındaşı Heider nâm Yahudi mahzarlarında tav‘an ikrâr ve i‘tirâf edip mezkûrân Bünyamin ve Heider bundan akdem benim yedimde mezbûr Perle’den iştirâ ve kabz eyleyip semeni kabza beni havâle eylediği beynlerinde ma‘lûm çuka ve kumaş semenlerinden mezkûrân Bünyamin ve Heider zimmetlerinde olan altı bin riyâlî guruşu mezkûrân Bünyamin ve Heider yedlerinden kabza havâle olduğum hasebiyle bi’t-tamâm ahz u kabz eylediğimden mâ‘adâ mezkûrân Bünyamin ve Heider ile târih-i kitâba gelince beynimizde vâki‘ olan bey‘ ve şirâ ve ahz u i‘tâ ve dellâliyyeden ba‘de külli hesâb zimmetlerinde beş yüz riyâlî guruş hakkım zuhûr edip hâlâ zimmetlerinde zuhûr eden beş yüz guruş hakkımı mezkûrân Bünyamin ve Heider yedlerinden bi’t-tamâm ahz u kabz eyleyip târih-i kitâba gelince mezkûrân Bünyamin ve Heider ile beynimizde vâki‘ olan bey‘ ve şirâ ve ahz u i‘tâ ve sâir mu‘âmelâta müte‘allika da‘vâdan mezkûrân Bünyamin ve Heider’in zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm târih-i kitâba gelince mezkûrân Bünyamin ve Heider üzerlerinde ve kıbellerinde bir akçe ve bir habbe hakkım bâkī kalmadı dedikde mukırr-ı mezkûr Mosi vech-i muharrer üzere cârî ve sâdır olan ikrârında mezkûrân Bünyamin ve Heider vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâdî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Çelebi b. el-Hâc Himmet, Osman Beşe çukadâr, İsa Bey b. Ahmed, Mehmed Çelebi b. Haydar ve gayruhüm mine’l-[hâzırîn.]