Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 295 Hüküm no: 258 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Halîfe b. Hacı Hüseyin’in boşandığı karısından doğan küçük kızı Fatma için verdiği nafaka bedelinin aylık iki yüz akçeden yüz elli akçeye indirildiği Mahmiye-i İstanbul’da Soğanağa mahallesi sâkinlerinden işbu bâ‘isü’l-vesîka Ahmed Halîfe b. el-Hâc Hüseyin nâm kimesne meclis-i şer‘-i hatîr-i lâzimü’t-tevkīrde zevce-i mutallakası Âişe bt. Mustafa nâm hâtundan mütevellide sulbiye sagīre kızı Fâtıma’nın ceddesi Hânım bt. Hasan nâm hâtun mahzarında takrîr-i kelâm edip kızım mezbûre Fâtıma’nın vâlidesi olup zevce-i mutallakam merkūme Âişe nefsini âhara tezvîc etmekle hakk-ı hıdânesi sâkıt olup mezbûre Fâtıma’yı bi-hakkı’l-hıdâne ceddesi mezbûre Hânım alıp sagīre-i mezbûrenin nafaka ve kisvesi için bundan akdem üzerime kıbel-i şer‘-i hatîrden beher şehr ikişer yüz akçe nafaka farz u takdîr etdirmişidi lâkin ben medyûn olup asârım zâhir olmağla meblağ-ı mezbûru edâya adem-i kudretim olmağın meblağ-ı mezbûrun beher şehr ellişer akçesi hat ve tenzîl olunmak matlûbumdur dedikde fi’l-hakīka mezbûr Ahmed Halîfe’nin asârı zeyl-i rakîmde muharrerü’l-esâmi olan sikāt-i sahîhatü’l-kelimât ihbârları ile lede’ş-şer‘i’l-mutahhar zâhir ve müte‘ayyin oldukdan sonra hâkim-i muvakkı‘-ı kitâb tûbâ lehü ve hüsnü-meâb hazretleri dahi nafaka-i mefrûza-i mezbûrenin beher şehr ellişer akçesini hat ve tenzîl edip meblağ-ı bâkī yevmî beşer akçeyi sagīre-i mezbûrenin zarûriyyesine farz ve sarfa ve vakt-ı zarûretde istidâneye ve lede’z-zafer mezbûr Ahmed Halîfe’ye rücû‘a mezbûre Hânım’a izin verilip mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Veli Efendi b. İsmail, Mehmed Çelebi b. Ahmed, Mustafa Efendi b. Muharrem, Hâcı Ca‘fer b. Abdullah, İbrahim b. Ömer, Osman Beşe b. Sevindik, İsa Bey b. Ahmed, İsmail b. Yunus, Ahmed Çelebi b. Abdülkerim.