Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 297 Hüküm no: 260 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Toma’nın Abdi Subaşı mahallesindeki mülk evini Dimitri v. Nasakalu’ya on sekiz bin beş yüz akçeye sattığı Mahmiye-i İstanbul hısnı ebvâbından Fenerkapısı ahilinde Abdi Subaşı mahallesinde sâkin Yorgi v. Toma nâm zimmî meclis-i şer‘-i hatîr-i lâzimü’t-tevkīrde mahalle-i mezbûre ahâlîsinden işbu râfi‘ü’l-kitâb Dimitri v. Nasakalu nâm zimmî muvâcehesinde tav‘an ikrâr ve i‘tirâf edip mahalle-i mezkûrede vâki‘ bir tarafdan Yazıcı Filibe nâm zimmî mülküne ve bir tarafdan kal‘a duvarına ve iki tarafdan tarîk-ı âmma müntehî olup iki bâb fevkānî ve bir bâb tahtânî odaları ve kenîfi müştemil olan mülk menzilimi kâffe-i hukūk ve merâfıkıyla mezbûr Dimitri’ye on sekiz bin beş yüz fıddî râyic fi’l-vakt akçeye tarafeynden îcâb ve kabûlü hâviye bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve tesellüm eyledikden sonra semeni olan meblağ on sekiz bin beş yüz akçeyi mezbûr Dimitri yedinden bi’t-tamâm ahz u kabz eyledim ba‘de’l-yevm menzil-i mezkûr mezbûr Dimitri’nin mülk-i müşterâsıdır keyfe mâ yeşâ ve yahtâr mutasarrıf olsun dedikde mukırr-ı mezbûr Yorgi[’nin] vech-i muharrer üzere cârî ve sâdır olan ikrârında el-mukarru lehü’l-mezkûr Dimitri vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min-Şevvâl li-sene seb‘a ve sittîn ve elf. Şühûdü’l-hâl: Hasan Beşe b. Pîrî, Hüseyin Bey b. Abdullah, Osman Beşe b. Abdullah ve gayruhüm mine’l-[hâzırîn.]