Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 297 Hüküm no: 261 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anna bt. Yani’nin kendisi adına harcamalarda bulunan dava vekili Kostantin v. Yako ile aralarında çıkan anlaşmazlıkta sulh olduğu Mahmiye-i İstanbul’da Fenerkapısı kurbünde Abdi Subaşı [mahallesi] ahâlîsinden târih-i kitâbdan dört sene mukaddem hâlik olan Yazıcı Filibe v. Avril nâm zimmînin hâl-i hayâtında hizmetkârı olan Kostantin v. Yako meclis-i şer‘-i hatîr-i lâzimü’t-tevkīrde hâlik-i mezbûrun mu‘tekası olan işbu râfi‘atü’l-kitâb Anna bt. Yani nâm Nasrâniye muvâcehesinde tav‘an ikrâr ve i‘tirâf [edip] hâlik-i mezbûr Filibe’nin zâhirde vâris-i ma‘rûfu olmamağla terekesi beytü’l-mâle âid ve râci‘ olmağın târih-i mezbûrede beytü’l-mâl emîni olan ( ) nâm kimesne tereke-i hâlik-i mezbûra vaz‘-ı yed eylemekle mezbûre Anna’dan hâlik-i mezbûrun terekesinden bazı eşyâ ahz ve ketm eyledin deyu da‘vâ ve taleb etmekle mezbûre Anna dahi emîn-i mezkûr ile red ve cevâba beni tarafından vekîl ve menâbına nâib nasb ü ta‘yîn eylediğinde mâlından husûs-ı mezkûr için her ne mikdâr akçe harc u sarf edersen sana bi’t-tamâm edâ edeyim demekle ben dahi husus-ı mezkûr için mezbûrenin emri ile harc u sarf eylediğim doksan üç riyâlî guruşu mezbûre Anna’dan da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip mezbûre Anna ile beni meblağ-ı mezbûr doksan üç riyâlî guruş da‘vâsından otuz üç riyâlî guruş üzerine sulh ettiklerinde ben dahi sulh-ı mezkûru kabûl edip bedel-i sulh olan meblağ-ı mezkûr otuz üç guruşu mezbûre Anna yedinden bi’t-tamâm ahz u kabz eyleyip zikrolunan doksan üç guruş da‘vâsından mezbûre Anna’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm meblağ-ı mezkûra müte‘allik mezbûre Anna üzerine bi-vechin mine’l-vücûh ve sebebin mine’l-esbâb da‘vâ ve hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ramazan Çavuş b. Abdullah, Hasan Beşe b. Abdullah, İbrahim Beşe b. Abdullah, Osman Beşe çukadâr ve gayruhüm mine’l-[hâzırîn.]