Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 298 Hüküm no: 262 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hacı Ahmed’in Eflani kazasındaki mülk menzilini oğlu Resul Beşe’ye yirmi guruşa sattığı Vilâyet-i Anadolu’da Kastamonu sancağında Eflani kazâsına tâbi‘ Havlu nâm karye sükkânından İbrahim b. el-Hâc Ahmed nâm kimesne meclis-i şer‘-i şerîf-i lâzimü’t-teşrîfde sulbî kebîr oğlu işbu bâ‘isü’l-[kitâb] Resul Beşe nâm kimesne mahzarında bi’t-tav‘i’s-sâf ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafdan Abdulbâki b. Abdurrahman mülküne ve bir tarafdan İshak b. Mehmed mülküne ve iki tarafdan tarîk-ı âmma müntehî birbirine mülâsık bir çatma oda ve bir anbar ve havlu ve kenîfi müştemil mülk menzilim bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık yirmi kıt‘a riyâlî guruşa merkūm Resul Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ eylediğimden sonra semeni olan meblağ-ı merkūm yirmi kıt‘a riyâlî guruşu mukaddemâ beynimizde ma‘lûm oğlum mezbûr Resul Beşe’nin tarla bedelinden zimmetimde olan yirmi riyâlî guruş hakkı ile takās edip ol dahi mukāssa [ve] kabûl eyledikden sonra menzil-i mahdûd-ı mezbûru zabt u tasarrufa müşterî-i merkūm Resul Beşe’yi taslît eyledim ba‘de’l-yevm mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâlis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Atâullah Efendi b. Hüsameddin, es-Seyyid Mehmed Efendi el-kādî, Hasan Efendi b. Mahmud, Suhte Mehmed Ağa b. Abdullah, Mustafa Çelebi b. Ahmed, Ömer Ağa b. Osman ve gayruhüm mine’l-[hâzırîn.]