Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 299 Hüküm no: 263 Orijinal metin no: [38b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Ahmed’in kocası İsa b. Musa’dan boşandığı (Muhâla‘a) Mahmiye-i İstanbul’da Müftî Ali Çelebi mahallesinde sâkine olup sin ve cüssesinin bülûğa tahammülü olup bülûğuna mu‘terife olan Emetullah bt. Ahmed nâm hâtun meclis-i şer‘-i hatîr-i lâzimü’t-tevkīrde zevc-i dâhil-bihâsı olan işbu râfi‘ü’l-kitâb İsa b. Musa mahzarında bi-tav‘ihâ ikrâr ve i‘tirâf edip zevcim mezbûr İsa zimmetinde mütekarrir olan üç bin akçe mehr-i müeccelim ve nafaka-i iddetim ve meûnet-i süknâm üzerine zevcim mezbûr İsa ile muhâla‘a-i sahîha-i şer‘iyye ile muhâla‘a edip zevciyyete müte‘allika âmme de‘âvîden zevcim mezbûr İsa’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde mezbûr İsa dahi vech-i muharrer üzere hul‘-ı mezbûru kabûl eyledim dedikde ehadühümâ âharın vech-i meşrûh üzere cârî ve sâdır olan ikrârını vicâhen tasdîk ve şifâhen tahkīk mâ-vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi b. Salih el-kâtib, Mustafa Efendi b. Muharrem, Osman Beşe çukadâr, Salih [b.] Mehmed Çelebi el-mukayyid ve gayruhüm mine’l-[hâzırîn.]