Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 299 Hüküm no: 264 Orijinal metin no: [38b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Prato v. Yani’nin Göllükesri kazasındaki mülk menzilini üç bin akçeye İstamko v. Yuvan’a sattığı Vilâyet-i Rumeli’nde Göllükesri kazâsına tâbi‘ Gıranise nâm karye ahâlîsinden Prato v. Yani nâm zimmî meclis-i şer‘-i hatîr-i lâzimü’t-tevkīrde işbu râfi‘ü’l-kitâb İstamko v. Yuvan nâm zimmî muvâcehesinde tav‘an ikrâr ve i‘tirâf edip zikri âtî akdin sudûruna değin silk-i mülkümde muntazam yedimde mülk ve hakkım karye-i mezkûrede vâki‘ bir tarafdan Ahmed b. Mahmud mülküne ve bir tarafdan Pîrî b. Muslı mülküne ve bir tarafdan Kürkçü Koçı nâm zimmî mülküne ve bir tarafdan tarîk-ı âmma müntehî olup bir bâb fevkānî ve bir bâb tahtânî odaları ve havluyu müştemil olan cemî‘ mülk menzilimi kâffe-i hukūk ve merâfıkıyla mezbûr İstamko’ya üç bin fıddî râyic fi’l-vakt akçeyi tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl eyleyip semeni olan meblağ-ı mezbûr üç bin akçeyi mezbûr İstamko yedinden bi’t-tamâm ahz u kabz eylediğimden sonra menzil-i mahdûd-ı mezkûru mahallinde zabt ve kabzına mezbûr İstamko’yu taslît eyledim dedikde mukırr-ı mezbûr Prato’yu vech-i muharrer üzere cârî ve sâdır olan ikrârında el-mukarru lehü’l-mezkûr İstamko vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, İsa Bey b. Ahmed, el-Hâc Ca‘fer b. Abdullah, Ahmed Çelebi b. Abdullah ve gayruhüm mine’l-[hâzırîn.]