Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 303 Hüküm no: 270 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Selim Han Vakfı adına Hüseyin Bey b. Veli’nin Emir Yakub mukataasından tahsil eyleyip Kayıkçı Avanis v. Mardros’a emanet ettiği parayı eksiksiz geri teslim aldığı Mahmiye-i İstanbul’da vâki‘ merhûm ve mağfûrun-leh Sultân Selim Hân -aleyhi’r-rahmetü ve’l-gufrân- hazretlerinin evkāfı mütevellîsi olan mefharül-emâsil ve’l-a‘yân Ebûbekir Ağa tarafından husûs-ı âti’l-beyânı ikrâra vekîl olduğu hasm-ı câhid-i şer‘î mahzarında şer‘an [vekâleti] sâbit ve mütehakkık olan Hüseyin Bey b. Veli meclis-i şer‘-i hatîr-i lâzimü’t-tevkīrde kayıkçı tâifesinden işbu hâmilü’s-sifr Avanis v. Mardros nâm Ermeni muvâcehesinde bi’l-vekâle ikrâr ve takrîr-i kelâm edip evkāf-ı mezbûre mukāta‘âtından Hayrabolu kazâsına [tâbi‘] Emir Ya‘kub nâm mukāta‘anın hâlâ emîni olan Hasan Ağa nâm kimesneden vekâletim hasebiyle tahsîl eylediğim on beş bin akçeyi mukaddemâ Ruscuk İskelesi’nde merkūm Avanis’in yedine emânet vaz‘ etmişdim hâlâ meblağ-ı mezbûr on beş bin akçeyi yine vekâletim hasebiyle mezbûr Avanis yedinden tamâmen ahz u kabz eyledim min ba‘d meblağ-ı mezbûran merkūm Avanis zimmetinde bir akçe ve bir habbe kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, İsa Bey b. Ahmed, Abdi Bey el-câbî, Veli Bey b. Mansur ve gayruhüm mine’l-[hâzırîn.]