Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 304 Hüküm no: 271 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Verbeto v. Yorgi’nin sattığı yağ bedelinden olan alacağını ödemesi için Hacı Derviş b. Hacı Mustafa’ya beş ay süre verdiği Bakkal tâifesinden olup mahmiye-i İstanbul’da Tavukpazarı’nda sâkin râfi‘ü’s-sifr Verbeto v. Yorgi nâm zimmî meclis-i şer‘-i hatîr-i lâzimü’t-tevkīrde çörekçi tâifesinden el-Hâc Derviş b. el-Hâc Mustafa mahzarında ikrâr ve takrîr-i kelâm edip mezbûr el-Hâc Derviş zimmetinde her vakıyyesi yirmi ikişer akçeye olmak üzere yüz vakıyye sâde yağ semeninden iki bin iki yüz akçe hakkım olup hâlâ taleb eylediğimde def‘aten edâya kudreti olmayıp taksîte tâlib olmağla ben dahi meblağ-ımezbûr iki bin iki yüz akçenin iki bin akçesini târih-i kitâbdan dört ay tamâmına değin her ayda beşer yüz akçe verip ba‘de[hû] bir ayda dahi iki yüz akçe vermek üzere meblağ-ı mezbûru târih-i kitâbdan beş ay tamâmına değin mezbûr el-Hâc Derviş’e taksît eylediğimde ol dahi taksît-i mezbûru kabûl eyledi dedikde mukırr-ı mezbûr Verbeto’nun minvâl-i muharrer üzere cârî ve sâdır olan ikrârını el-mukarru lehü’l-mezbûr el-Hâc Derviş vicâhen tasdîk ve şifâhen tahkīk etmeğin mezbûr el-Hâc Derviş’in nefsine ve firâr ve gaybet ederse meblağ-ı mukassat-ı mezbûra zevcesi olup mahmiye-i mezbûrede Peykhâne mahallesinde sâkine Hadice bt. el-Hâc Haydar nâm hâtun kefâlet-i sahîha-i şer‘iyye ile kefîl oldukdan sonra mezbûre Hadice’nin dahi nefsine yine mahalle-i mezbûre sükkânından Şeyh Ali b. Hüseyin nâm kimesne kefîl olmağın mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ramazan Çavuş b. Abdullah el-mübâşir, Osman Beşe çukadâr, Mehmed Çelebi b. Haydar, İsa Bey b. Ahmed.