Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 304 Hüküm no: 272 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İskerlet v. Yorgi’nin sattığı et bedelinden olan alacağını ödemesi için Çörekçi Hacı Derviş b. Hacı Mustafa’ya yedi ay süre verdiği Kasab tâifesinden İskerlet v. Yorgi nâm zimmî meclis-i şer‘-i hatîrde çörekçi tâifesinden el-Hâc Derviş b. el-Hâc Mustafa mahzarında ikrâr ve takrîr-i kelâm edip mezbûr el-Hâc Derviş zimmetinde yedimden müşterâ ve makbûz et semeninden ba‘de külli hesâb bin iki yüz elli akçe hakkım olup hâlâ taleb eylediğimde def‘aten edâya iktidârı olmamağla taksîte tâlib olmağın ben dahi meblağ-ı mezbûr bin iki yüz elli akçeyi târih-i kitâbdan altı ay tamâmına değin her ayda ikişer yüz akçe verip ba‘dehû bir ayda dahi elli akçe vermek üzere cem‘an yedi ay tamâmına değin mezbûr el-Hâc Derviş’e taksît eylediğimde ol dahi taksît-i mezbûru kabûl eyledi dedikde gıbbe’t-tasdîkı’l-mu‘teber mezbûr el-Hâc Derviş’in nefsine ve firâr ve gaybet ederse meblağ-ı mukassat-ı mezbûra zevcesi olup mahmiye-i İstanbul’da Peykhâne mahallesinde sâkine Hadice bt. el-Hâc Haydar nâm hâtun kefâlet-i sahîha-i şer‘iyye ile kefîl oldukdan sonra mezbûre Hadice’nin dahi nefsine yine mahalle-i mezbûre sükkânından Şeyh Ali b. Hasan nâm kimesne kefîl olmağın mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: es-Sâbıkūn.