Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 305 Hüküm no: 273 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Zaharya’nın İbrahim Reis Vakfı’ndan ödünç aldığı Galata kazâsına tâbi‘ İstinye nâhiyesinde Karye-i cedîd sâkinlerinden Kostantin v. Zaharya nâm zimmî meclis-i şer‘-i hatîr-i lâzimü’t-tevkīrde merhûm İbrahim Reis Vakfı’na meşrûtiyet üzere bi’l-fi‘il mütevellî olan işbu bâ‘isü’l-kitâb Ahmed Çelebi b. Halil mahzarında bi’t-tav‘i’s-sâf ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik olup karye-i mezbûrede vâki‘ bir tarafı Mustafa Ağa b. Mehmed Kethüdâ mülkü ve bir tarafı Gölika bt. Apostol nâm Nasrâniye mülkü ve bir tarafı Lefter v. Apostol nâm zimmî mülkü ve bir tarafı Aleksandri v. Yorgi mülkü [ile] mahdûd ve mümtâz tûlen yirmi dört buçuk zirâ‘ ve arzan on zirâ‘ altı parmak ve mezbûre Gölika’nın mülküne muttasıl köşe ki tûlen dört zirâ‘ altı parmak ve arzan dört zirâ‘ altı parmak eşcâr-ı müsmire ve gayr-ı müsmireyi müştemil mülk bahçemi cemî‘ tevâbi‘ ve levâhıkı ve kâffe-i menâfi‘ ve merâfıkı ile mütevellî-i mezbûra bi-tarîkı’l-istiğlâl dört bin fıddî râyic fi’l-vakt [akçe]ye bey‘ ve teslîm ol dahi mâl-ı vakf-ı mezbûr ile iştirâ ve tesellüm ve kabûl ve semeni olan meblağ-ı mezbûr dört bin akçeyi yedinden bi’t-tamâm ahz u kabz eylediğimden sonra bahçe-i mahdûd-ı mezkûru ba‘de’t-tahliye ve’t-tekābüz târih-i kitâbdan sene tamâmına değin altı yüz akçeye bana îcâr ve teslîm edip ben dahi istîcâr ve tesellüm ve kabz eyledim dedikde gıbbe’t-tasdîk mâ-vaka‘a bi’t-taleb ketb olundu. Tahrîren fi’l-yevmi’s-sâlis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Salih Efendi el-kâtib, Mehmed b. Mahmud, İbrahim b. Mehmed, Ahmed b. Mahmud, Mustafa Efendi b. Muharrem ve gayruhüm mine’l-[hâzırîn.]