Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 305 Hüküm no: 274 Orijinal metin no: [39b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çocuksuz vefat eden Kebapçı Mehmed Ağa’nın hayatta iken mülk menzilini karısı Sâliha Hatun’a sattığı şahitlerle ispat olunduğundan beytülmal tarafından yapılan müdahalenin engellenmesi Hâssa tabbâhlardan olup mahmiye-i İstanbul’da Akşemseddin mahallesinde sâkin iken vefât eden Kebabcı Mehmed Ağa’nın zevcesi Sâliha Hâtun[’dan] gayrı vâris-i ma‘rûfu olmamağla terekesinin rub‘u mezkûre Sâliha Hâtun’a ve selâse-i erbâ‘ı beytü’l-mâle âid ve râci‘ olduğu zâhir ve mütebeyyin oldukdan sonra mezkûre Sâliha Hâtun meclis-i şer‘-i hatîr-i lâzimü’t-tevkīrde yine hâssa tabbâhlardan olup tâife-i mezbûrenin vâki‘ olan beytü’l-mâlını kabza me’mûr olan fahrü’l-akrân Ramazan Ağa b. Şa‘ban mahzarında üzerine takrîr-i da‘vâ edip zevcim müteveffâ-yı mezbûr Kebabcı Mehmed Ağa hâl-i hayâtında ve kemâl-i akl ve sıhhatinde târih-i kitâbdan altı ay mukaddem mahalle-i mezkûrede vâki‘ bir tarafdan Çavuşzâde Mehmed Çelebi mülküne ve bir tarafdan Emirkızı demekle ma‘rûfe Âişe Hâtun mülküne ve bir tarafdan Câbî Mehmed Çelebi mülküne ve bir tarafdan tarîk-ı âmma müntehî dört bâb fevkānî odaları altında matbahı ve bir halvetli hamamı ve havluyu ve kenîfi müştemil olan mülk menzilini kâffe-i hukūk ve merâfıkıyla bana on bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edip ben dahi minvâl-i muharrer üzere iştirâ ve tesellüm eylediğimden sonra semeni olan meblağ-ı mezkûru cihet-i karz-ı şer‘îden zevcim mezbûr Mehmed Ağa zimmetinde olan on bin akçe hakkıma takās edip menzil-i mahdûd-ı mezkûr vech-i meşrûh üzere mülk-i müşterâm olup mülkiyet üzere tasarrufumda iken mezbûr Ramazan Ağa menzil-i mezkûrun selâse-i [irbâ‘ı] beytü’l-mâle âid ve râci‘dir deyu vaz‘-ı yed murâd eder suâl olunup kasr-ı yedine tenbîh olunması matlûbumdur dedikde gıbbe’s-suâl ve akībe’l-inkâr müdde‘iye-i mezkûre Sâliha Hâtun’dan müdde‘âsını mübeyyine beyyine taleb olundukda udûl-i Müslimînden olup mahalle-i mezkûre ahâlîsinden Mehmed Çavuş b. Ali Çavuş ve Akseki mahallesi ahâlîsinden Ali b. Abdullah [40a] ve Karabaş mahallesi ahâlîsinden olup Keresteci el-Hâc Hüseyin b. Abdullah nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Kebabcı Mehmed Ağa hudûd-ı mezkûr ile mahdûd olan mülk mezilini hâl-i hayâtında ve kemâl-i akl ve sıhhatinde târih-i kitâbdan altı ay mukaddem bizim huzûrumuzda zevcesi işbu Sâliha Hâtun’a on bin fıddî râyic fi’l-vakt akçeye bey‘ ve teslîm edip ol dahi vech-i muharrer üzere iştirâ ve tesellüm eylediğinden sonra semeni olan meblağ-ı mezkûru zevcesi mezkûre Sâliha’nın cihet-i karzdan zimmetinde hakkı olan bin akçe hakkına takās eyledi menzil-i mahdûd-ı mezkûr bu vechile mezkûre Sâliha Hâtun’un mülk-i müşterâsı ve hakk-ı sırfıdır biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcibiyle menzil-i mezkûrdan Ramazan Ağa’nın kasr-ı yedine cânib-i şer‘den dahi tenbîh olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Çelebi b. Mehmed beytü’l-mâlci, Çukadâr Osman Beşe, İsa Bey b. Ahmed, Mehmed Çelebi b. İskender ve gayruhüm mine’l-[hâzırîn.]