Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 307 Hüküm no: 275 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ramazan’ın yeğeni merhum Hacı Ahmed Beşe’den intikal eden menzil hissesini Mehmed Beşe b. Mirza’ya altmış bin akçeye sattığı Medîne-i Üsküdar’da Gerede mahallesinde sâkin iken bundan akdem vefât eden Hâcı Ahmed Beşe b. Nurbeyi nâm kimesnenin verâseti zevce-i metrûkesi Âişe bt. İbrahim’e ve sulbî sagīr oğlu Mehmed’e münhasıra olup kable’l-kısme mezbûr Mehmed dahi vefât edip verâseti vâlidesi mezbûre Âişe Hâtun ve li-ebeveyn ammisi el-Hâc Ramazan nâm kimesneye münhasıra olduğu şer‘an zâhir ve müte‘ayyin oldukdan sonra mezbûr el-Hâc Ramazan meclis-i şer‘-i hatîr-i lâzimü’t-tevkīrde işbu bâ‘isü’l-vesîka Mehmed Beşe b. Mirzâ mahzarında ikrâr ve takrîr-i kelâm edip müteveffâ-yı evvel-i mezbûrun ile’l-vefât mülkü olup mahalle-i mezbûrede vâki‘ bir tarafı Mihaliçli Mehmed nâm kimesne mülküne ve bir tarafı Vekîl-i harc Hâcı nâm kimesne mülküne ve iki tarafı tarîk-ı âmma müntehî bir bâb fevkānî ve bir bâb tahtânî odaları ve bir köşk ve tahta-pûşu ve bir matbah ve bir hamam ve câmekânı ve cüneyneyi ve bi’r-i mâyı ve havlu ve kenîfi müştemil menzil ba‘de vefâtihî yirmi dört sehm i‘tibâr olunup sihâm-ı mezbûreden bi-tarîkı’l-münâsahati’ş-şer‘iyye on sehm mezbûre Âişe Hâtun’a ve on dört sehm dahi bana isâbet ve intikāl etmeğin hâlâ ben menzil-i mezbûrda olan on dört sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Beşe’ye altmış bin akçeye bey‘ ve teslîm ol dahi minvâl-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûr altmış bin akçenin kırk bin akçesini mezbûr Mehmed Beşe’ye cihet-i şer‘iyyeden zimmetimde deynim olan kırk bin akçeye takās ol dahi mukāssa ve kabûl edip semen-i bâkī yirmi bin akçeyi tamâmen mezbûr Mehmed Beşe yedinden ahz u kabz eyledim ba‘de’l-yevm menzil-i mahdûd-ı mezbûrda olan on dört sehm hisse-i şâyi‘am müşterî-i mezbûr Mehmed Beşe’nin mülk-i müşterâsıdır keyfe mâ yeşâ ve hasbemâ yahtâr mutasarrıf olunsun dedikde mukırr-ı mezbûr el-Hâc Ramazan’ın vech-i meşrûh üzere cârî ve sâdır olan ikrârını mezbûr Mehmed Beşe vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ahmed Bey b. Abdulbâki, Mehmed Ağa b. Abdullah, Süleyman Beşe b. Abdullah, Mustafa Beşe b. Abdullah 30. bölük, İbrahim Çelebi b. Mehmed, Mehmed Efendi b. Ahmed Efendi, el-Hâc Veli b. İsa, Ahmed b. Yusuf, el-Hâc Ebûbekir b. ( ).