Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 308 Hüküm no: 276 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Dimo’nun Abdi Subaşı mahallesindeki mülk evini Yorgi v. Kiti’ye yirmi üç bin beş yüz akçeye sattığı Mahmiye-i İstanbul’da Fenerkapısı kurbünde Abdi Subaşı mahallesi ahâlîsinden Mihal v. Dimo nâm zimmî meclis-i şer‘-i hatîr-i lâzimü’t-tevkīrde mahalle-i mezkûreden işbu râfi‘ü’l-kitâb Yorgi v. Kiti nâm zimmî mahzarında tav‘an ikrâr ve i‘tirâf edip zikri âtî akdin sudûruna değin silk-i mülkümde muntazam yedimde mülk ve hakkım olup mahalle-i mezkûrede vâki‘ bir tarafdan Kazgancı Lefter v. ( ) nâm zimmî mülküne ve bir tarafdan Sakızlı Oyani nâm zimmî mülküne ve bir tarafdan merhûm Kara Çelebizâde Mahmud Efendi Vakfı’ndan arsa-i hâliyeye ve bir tarafdan tarîk-ı âmma müntehî bir bâb fevkānî ve bir bâb tahtânî odaları ve tahta-pûşu ve müşterek su kuyusunu ve kenîfi müştemil olan cemî‘ menzilimi kâffe-i hukūk ve merâfıkıyla mezbûr Yorgi’ye yirmi üç bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezkûr yirmi üç bin beş yüz akçeyi mezbûr Yorgi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr mezbûr Yorgi’nin mülk-i müşterâsı ve hakk-ı sırfıdır keyfe mâ yeşâ mutasarrıf olunsun dedikde gıbbe’t-tasdîk mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abdullah Efendi b. Mehmed el-imâm, Hasan Halîfe b. Ahmed el-müezzin, Hasan b. Mehmed el-müezzin, Derviş b. Mehmed, Ramazan Beşe b. ( ) er-râcil, Mehmed Beşe b. Abdullah, Osman Beşe çukadâr ve gayruhüm mine’l-[hâzırîn.]