Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 308 Hüküm no: 277 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh Çelebi’den varislerine intikal eden dükkanların kira gelirinden küçük oğlu Süleyman’a günlük beş akçe nafaka takdir olunduğu Mahmiye-i İstanbul’da Kızılmusluk mahallesinde sâkin iken bundan akdem vefât eden Nuh Çelebi b. Süleyman’ın zevce-i metrûkesi sâhibetü hâze’l-kitâb Sâliha bt. Hasan nâm hâtun müteveffâ-yı mezbûrun kendiden tevellüd edip bi-hakkı’l-hıdâne hacr ve terbiyesinde olan sulbî sagīr oğlu Süleyman’ı meclis-i şer‘-i hatîr-i lâzimü’t-tevkīrde ihzâr eyleyip sagīr-i mezbûra babası müteveffâ-yı mezbûrdan irsle intikāl eden iki bâb mülk dükkânın icârâtından savb-ı şer‘den nafaka ve kisve takdîr ve farz olunmasını taleb etdikde hâkim-i muvakkı‘-ı sadr-ı kitâb tûbâ lehü ve hüsnü-meâb hazretleri dahi sagīr-i mezbûrun nafaka ve kisvesine ve sâir levâzım-ı zarûriyesine zikrolunan dükkânların icârâtından târih-i kitâbdan beher yevm beşer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûra sarfa ve lede’z-zarûre istidâneye ve vakt-i zaferde icârât-ı dükkâneyn-i mezkûreyne rücû‘a ve kabzına izin vermeğin mâ-hüve’l-vâki‘ merkūme Sâliha Hâtun talebi ile ketb ve imlâ olunup merkūme yedine def‘ ve i‘tâ olundu. Fi’l-yevmi’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi imâm-ı mahalle-i mezbûre, Mehmed Efendi b. ( ) mu‘allim-i ta‘lîmhâne der-mahalle-i mezbûre, Mehmed Çelebi el-müezzin, Hasan b. Mehmed, Receb b. Mustafa ve gayruhüm mine’l-[hâzırîn.]