Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 309 Hüküm no: 278 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Diyani v. Serandi’nin ölen Drako v. Kostantin’de olan yüz elli guruş alacağının terekesinden ödenmesi Mahmiye-i İstanbul’da Kumkapısı kurbünde Çadırcı Ahmed Çelebi mahallesi ahâlîsinden olup kürkçü tâifesinden Diyani v. Serandi nâm zimmî meclis-i şer‘-i hatîr-i lâzimü’t-tevkīrde mahalle-i mezbûre ahâlîsinden iken hâlik olan Drako v. Kostantin nâm zimmînin sulbiye sagīre kızı Kasandra’nın tesviye-i umûruna kıbel-i şer‘den mansûbe vasîsi olan Gavrina bt. İspelyot nâm Nasrâniye muvâcehesinde üzerine takrîr-i da‘vâ edip sagīre-i mezbûrenin babası hâlik-i mezkûr Drako ile ale’l-iştirâki’s-seviy mülkümüz olup zikrolunan Kumkapı hâricinde vâki‘ bir tarafdan Abacıoğlu Dimitraki meyhânesine ve bir tarafdan Hallâcoğlu meyhânesine ve iki tarafdan tarîk-ı âmma müntehî bir bâb ekmekçi ve bir bâb bakkal dükkânlarını müştemil olup arsasının senede Ayasofya-i kebîr Vakfı’na yetmiş akçe mukāta‘ası olan cemî‘ meyhânenin nısfı benim mülküm ve nısf-ı âharı hâlik-i mezbûr Drako’nun mülkü olup ale’l-iştirâk mülkiyet üzere tasarrufumuzda iken zikrolunan meyhâneden benim mülk ve hakkım olan nısf-ı şâyi‘ini hâlik-i mezbûr Drako’ya hâl-i hayâtında bin altmış üç senesinde bir sene tamâmına değin üç yüz riyâlî guruşa îcâr ve teslîm edip ol dahi minvâl-i muharrer üzere istîcâr ve tesellüm eyledikden sonra ücret-i mezkûreden hâsıl olan meblağ-ı [40b] mezkûrun yüz elli guruşunu hâlik-i mezbûr Drako hâl-i hayâtında ahz u kabz edip mâ‘adâsı olan yüz elli riyâlî guruş kable’l-istîfâ hâlik olmağla zimmetinde kalmışidi hâlâ vasiyy-i mezbûrdan suâl olunup tereke-i hâlik-i mezbûrdan alıverilmesi matlûbumdur dedikde gıbbe’s-suâl vasiyye-i mezbûre Gavrina husûs-ı mezkûru bi’l-külliyye inkâr edicek müdde‘î-i mezbûr Diyani[’den] müdde‘âsını mübeyyine beyyine taleb olundukda mahmiye-i mezkûrede Lanka kurbünde Çakır Ağa mahallesinde sâkin Kostantin v. Yorgi ve Samatyakapısı dâhilinde sâkin Manol v. İspelyot ve zikrolunan Çadırcı Ahmed mahallesinde sâkin Kiryako v. Panayot nâm zimmîler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘î-i mezbûr Diyani hâlik-i mezkûr Drako ile ale’l-iştirâki’s-seviy mülk ve hakları olan meyhânede olan nısf-ı şâyi‘ini hâlik-i mezbûr Drako’ya hâl-i hayâtında bir sene tamâmında değin üç yüz riyâlî guruşa bizim huzûrumuzda îcâr ve teslîm edip ol dahi minvâl-i muharrer üzere istîcâr ve tesellüm eyledikden sonra meblağ-ı mezbûrun yüz elli guruşunu mezkûr Drako’dan hâl-i hayâtında ahz u kabz edip mâ‘adâsı olan yüz elli guruşu kable’l-îfâ hâlik olmağla zimmetinde kalmışdır biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde şehâdetleri makbûle oldukdan sonra müdde‘î-i mezbûr Diyani’ye ücret-i mezkûreden hâlik-i mezkûr zimmetinde bâkī kalan yüz elli guruş hakkından küllen ve bazen ahz u istîfâ veyâ hibe ve âhara havâle etmediğine yemîn teklîf olundukda ol dahi alâ vefki’l-mes’ûl yemîn billâhi’l-lezî enzele’l-İncîle alâ İsa aleyhisselâm edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Derviş b. Abdülcelil, el-Hâc Mahmud b. Hâcı Ömer, Ömer b. Ali, Mehmed b. Yusuf, Hüseyin Ağa b. ( ) camcı ve gayruhüm mine’l-[hâzırîn.]