Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 310 Hüküm no: 279 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rali v. Rika’nın babasından kendisine intikal eden harap mülk evini vasisi marifetiyle Yani v. Kosta’ya on iki bin akçeye sattığı Mahmiye-i İstanbul hısnı ebvâbından Eğrikapı dâhilinde Çakır Ağa mahallesinde sâkin iken bundan akdem hâlik olan Rika v. Palaloga nâm zimmînin verâseti zevce-i metrûkesi Örmekine nâm Nasrâniye ile sulbî sagīr oğlu Rali’ye münhasıra olduğu şer‘an zâhir ve müte‘ayyin oldukdan sonra sagīr-i mezbûrun tesviye-i umûruna kıbel-i şer‘den vasî nasb olunan ceddesi Zabye bt. Yorgi nâm Nasrâniye meclis-i şer‘-i şerîf-i lâzimü’t-teşrîfde işbu hâmilü’s-sifr Yani v. Kosta nâm zimmî muvâcehesinde bi’l-vesâye ikrâr ve takrîr-i kelâm edip mahalle-i mezbûrede vâki‘ bir tarafdan Yani v. İstemat ve bir tarafdan Despino bt. İstati mülkü ve iki tarafdan tarîk-ı âm ile mahdûd mülk menzil sagīr-i mezbûrun babası hâlik-i mezbûrun ile’l-helâk mülkü olup ba‘de helâkihî zevcesi mezbûre Örmekine hisse-i irsiyyesi müteveffâ-yı mezbûrun sâir metrûkâtından ahz edip menzil-i mahdûd-ı mezbûr bi-hasebi’l-irsi’ş-şer‘î ancak sagīr-i mezbûra intikāl etmişidi lâkin menzil-i mezbûr mürûr-ı eyyâm ile harâba müşrif ve sagīr-i mezbûrun âhar meskeni olup ve ta‘mîre kudreti olmamağla menzil-i mezbûr âhara bey‘ olunması sagīr-i mezbûra her vechile enfa‘ olmağın menzil-i mahdûd-ı mezkûr sûk-ı sultânîde müzâyede ve tâlibîne arz olundukda merkūm Yani üzerinde on bin nakd râyic fi’l-vakt akçede karâr edip ziyâde ile tâlib-i âhar zuhûr etmediğinden mâ‘adâ merkūm Yani meblağ-ı mezbûr on bin akçenin üzerine iki bin akçe dahi ziyâde etmekle ben dahi vesâyetim hasebiyle cemî‘ menzil-i merkūmu meblağ-ı merkūm on iki bin akçeye tarafeynden îcâb ve kabûlü hâvî bey‘-i bât ile bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr on iki bin akçeyi mezbûr Yani yedinden tamâmen ahz u kabz eyledim min ba‘d menzil-i mahdûd-ı mezbûr merkūm Yani’nin mülk-i müşterâsıdır keyfe mâ yeşâ ve yahtâr mutasarrıf olunsun dedikde mahalle-i mezbûre ahâlîsinden olup zeyl-i kitâbda muharrerü’l-esâmi olan Müslimîn meclis-i şer‘a gelip menzil-i mezbûrun vech-i muharrer üzere harâba müşrif olup menzil-i mezbûrun bey‘ olunması sagīr-i mezbûra enfa‘ idiğini ve meblağ-ı mezbûr semen-i mislinden evfer ve ezyed idiğini haber verdiklerinde hâkim-i muvakkı‘-ı sadr-ı kitâb tûbâ lehü ve hüsnü-meâb hazretleri bey‘-i mezbûrun tenfîzine hükm-i sahîh-i şer‘î kıldıktan sonra hâlik-i mezbûrun üvey babası olup yine mahalle-i mezbûre sükkânından olan Hıristo v. Dimitri ve Foti v. Mosi nâm zimmîler yine meclis-i şer‘de herbirimizin derk-i menzil-i mahdûd-ı mezbûra kefîl olduk dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ali Efendi b. Mehmed imâm-ı mahalle-i mezbûre, Yahya Efendi b. Mehmed müezzin-i mahalle-i mezbûre, Mehmed Çelebi b. Üveys el-muhzır, Şa‘ban Beşe b. Abdurrahman ve gayruhüm mine’l-[hâzırîn.]