Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 311 Hüküm no: 280 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Hatarşe’nin Cerrahpaşa mahallesindeki binalarını Araton v. Pargam’a yüz elli guruşa sattığı Mahmiye-i İstanbul hısnı ebvâbından Topkapısı dâhilinde Fâtıma Sultân mahallesinde sâkin Kirkor v. Hatarşe nâm Ermeni meclis-i şer‘-i hatîr-i lâzimü’t-tevkīrde işbu hâmilü’s-sifr Araton v. Pargam nâm Ermeni muvâcehesinde tav‘an ikrâr ve i‘tirâf edip mahmiye-i mezbûre mahallâtından Cerrâhpaşa mahallesinde vâki‘ bir tarafdan Hâcı Osman Çelebi b. Ali mülkü ve iki tarafdan kenîse duvarı ve bir tarafdan tarîk-ı âm ile mahdûd arsa üzerinde mebnî olup tabaka-i ulyâda üç bâb oda ve tabaka-i vüstâda dahi üç bâb ve tahtânîde üç bâb oda ve kenîfi ve cümle ebniye-i mezkûreyi nakd-i râyic fi’l-vakt bin yüz elli kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Araton’a bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûr bin yüz elli kıt‘a riyâlî guruşu müşterî-i mezbûr Araton yedinden tamâmen ahz u kabz eyledim ba‘de’l-yevm ebniye-i mezkûre müşterî-i mezbûrun mülk-i müşterâsıdır benim alâka ve medhalim yokdur keyfe mâ yeşâ ve yahtâr mutasarrıf olunsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Es-seyyid Ali Çelebi b. Mehmed imâm-ı [mahalle-i] Cerrâhpaşa, Abdurrahman Çelebi b. Mehmed müezzin-i [mahalle-i] Cerrâhpaşa, Mustafa Efendi b. Muharrem, İsa Bey b. Ahmed ve gayruhüm mine’l-[hâzırîn.]