Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 312 Hüküm no: 281 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. İstifan’ın Ohri mahallesindeki mülk menzilinin bazı odalarını damadı Toma v. Todori’ye yüz elli guruşa sattığı Mahmiye-i İstanbul hısnı ebvâbından Balatkapısı dâhilinde Ohri mahallesinde sâkin Panayot v. İstifan nâm zimmî meclis-i şer‘-i hatîr-i lâzimü’t-tevkīrde damadı işbu hâmilü’s-sifr Toma v. Todori nâm zimmî muvâcehesinde tav‘an ikrâr ve i‘tirâf edip mahalle-i mezbûrede vâki‘ bir tarafdan Demirci Yani v. Mihal mülkü ve bir tarafdan Dimitri v. Menaso mülkü ve bir tarafdan Uncu Yani mülkü ve bir tarafdan tarîk-ı âm ile mahdûd üç bâb fevkānî ve bir bâb tahtânî oda ve bir tahta-pûş ve bir bi’r-i mâ ve kenîfi müştemil mülk menzilimin mezbûr Demirci Yani tarafında olan bir bâb fevkānî ve bir bâb tahtânî odalarını nakd-i râyic fi’l-vakt yüz elli kıt‘a riyâlî guruşa bey‘-i bâtt-ı sahîh-i şer‘î ile damadım mezbûr Toma’ya bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezkûr yüz elli kıt‘a riyâlî guruşu damadım mezbûr Toma yedinden tamâmen ahz u kabz eyledim min ba‘d menzil-i mahdûd-ı mezbûrun mesfûr Demirci Yani tarafında olan bir bâb fevkānî ve bir bâb tahtânî odaları damadım merkūm Toma’nın mülk-i müşterâsıdır keyfe mâ yeşâ ve yahtâr mutasarrıf olunsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. Muharrem el-imâm, Osman Beşe çukadâr, İsa Bey b. Ahmed, İsmail Çelebi b. Yunus ve gayruhüm mine’l-[hâzırîn.]