Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 312 Hüküm no: 282 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Hayatî bt. Abdullah’ın yarım menzil hissesinin kullanım hakkını Yusuf Ağa b. Ali’ye altmış bin akçeye devrettiği Mahmiye-i İstanbul’da Molla Hüsrev mahallesinde sâkine Saraylı Hayatî Hâtun bt. Abdullah meclis-i şer‘-i hatîr-i lâzimü’t-tevkīrde işbu bâ‘isü’l-kitâb mu‘tekası Belkıs’ın zevci Yusuf Ağa b. Ali mahzarında ikrâr ve takrîr-i kelâm edip mahalle-i mezbûrede vâki‘ Uncu Mehmed Bey nâm sâhibü’l-hayrın vakfından olup icâre-i müeccele ve her şehrde vakf-ı mezbûra ücret-i müeccele ile bir tarafdan Medîne-i Münevvere Vakfı ve bir tarafdan vakf-ı mezbûr ve bir tarafdan el-Hâc Yusuf veresesi mülkleri ve bir tarafdan Solak Mehmed Çelebi mülkü ile mahdûd dört fevkānî odaları ve bir sofa ve bir kameriye ve kenîf ve üç bâb tahtânî odaları ve matbah ve serdâb ve kenîfi müştemil menzilin nısf-ı şâyi‘i benim ve nısf-ı şâyi‘-i âharı mu‘tekalarım işbu hâzırât bi’l-meclis Zamane ve Peymâne ve mezbûr Belkıs nâm hâtunların bi’l-iştirâk taht-ı tasarruflarında olmağla beher şehr on iki buçuk akçe ile tasarrufumda olan mârrü’z-zikr menzilin nısf-ı şâyi‘ini ben bundan akdem ma‘rifet-i mütevellî-i vakf-ı mezbûr ile bin elli sekiz senesi Şevvâli’nin on sekizinci gününde mezbûr Yusuf Ağa’ya altmış bin akçe bedel mukābilesinde ferâğ u tefvîz ve teslîm ol dahi tefevvüz ve kabûl ve tesellüm edip bedel-i ferâğ-ı mezbûr merkūm Yusuf Ağa zimmetinde kalmışidi hâlâ bedel-i mezkûr altmış bin akçeyi merkūm Yusuf Ağa yedinden tamâmen ahz u kabz edip menzil-i mahdûd-ı mezbûrda olan gerek nısf-ı şâyi‘ama ve gerek bedelinde bi-vechin mine’l-vücûh alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abbas Efendi [b.] İbrahim el-imâm, Abdülkerim Halîfe b. İbrahim, el-Hâc Mehmed b. Ebûbekir, Ali Beşe b. Mustafa, Mustafa Beşe b. Ahmed, Salih Çelebi b. Kurd, Hasan Çelebi b. Ramazan, Sefer Beşe b. Receb, Receb b. Abdullah ve gayruhüm mine’l-[hâzırîn.]