Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 313 Hüküm no: 283 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Hayatî bt. Abdullah’ın bazı eşyalarını azatlı cariyesi olan Peymane bt. Abdullah’a hibe ettiği Mahmiye-i İstanbul’da Gül Câmi‘i kurbünde Molla Hüsrev mahallesinde sâkine Saraylı Hayatî bt. Abdullah meclis-i şer‘-i hatîr-i lâzimü’t-tevkīrde mu‘tekası olan Peymâne bt. Abdullah nâm hâtun mahzarında bi-tav‘ihâ ikrâr ve i‘tirâf edip silk-i mülkümde münselik emlâkimden altı yemeni yasdık ve üç minder gılâfı ve bir beledî döşek ve üç yemeni yorgan ve beş sahan ve iki tencere ve bir tepsi ve bir güğüm ve bir leğen ve bir ibrik ve biri mâ’î ve biri beyâz iki kebe ve bir köhne Selanik keçesi ve bir köhne kaliçemi mu‘tekam mezbûre Peymâne Hâtun’a hibe-i sahîha-i şer‘iyye ile hibe ve temlîk edip ol dahi minvâl-i meşrûh [üzere] ittihâb ve kabûl ve kabz ve tesellüm eyledi ba‘de’l-yevm eşyâ-i mevhûbe-i mezkûre mu‘tekam mezbûre Peymâne Hâtun’un mülk-i mevhûbu olmuşdur dedikde mukırre-i mezkûre Hayatî Hâtun’u vech-i meşrûh üzere cârî ve sâdır olan ikrârında el-mukarru lehâ’l-mezkûre Peymâne Hâtun bi’l-müvâcehe tasdîk ve bi’l-müşâfehe tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abbas Efendi el-imâm, Mustafa Çavuş b. Halil, Musa b. Veli, Mustafa b. Mahmud, Osman Beşe çukadâr, İsa Bey b. Ahmed ve gayruhüm mine’l-[hâzırîn.]