Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 318 Hüküm no: 291 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Draka v. Kostantin’in meyhaneci ortağı Diyani v. Serandi’de olan alacağının varisleri tarafından tahsil olunup zimmetinin ibra edildiği Mahmiye-i İstanbul’da Kumkapı kurbünde Çadırcı Ahmed mahallesinde sâkin iken hâlik olan Drako v. Kostantin nâm zimmînin verâseti zevce-i metrûkesi Susanna bt. Filyo nâm Nasrâniye’ye ve vâlidesi Gavrina bt. İspelyot nâm Nasrâniye’ye ve sulbiye sagīre kızı Kasandra’ya ve li-ebeveyn ammisi Todori v. Yani nâm zimmîye münhasıra olup kable’l-kısme zevcesi mezbûre Susanna dahi hâlike olup verâseti ancak kızı sagīre-i mezbûreye münhasıra oldukdan sonra tereke-i hâlik-i evvel-i mezbûr yirmi dört sehm i‘tibâr olunup sihâm-ı mezkûreden üç sehmi zevcesi mezbûre Susanna’ya ve dört sehmi vâlidesi mezkûre Gavrina’ya ve on iki sehmini kızı sagīre-i mezbûreye ve beş sehmi ammisi mezkûre Todori’ye isâbet eylediği ve tereke-i hâlik-i evvel-i mezkûr Drako’dan zevcesi olup kendinden sonra hâlike olan mezkûre Susanna’nın sümün hisse-i şer‘iyyesi sadriye kızı sagīre-i mezbûre Kasandra’ya isâbet eylediği zâhir ve mütebeyyin oldukdan sonra mezkûr Gavrina kendi tarafından asâleten ve sagīre-i mezbûre Kasandra’nın tesviye-i umûruna kıbel-i şer‘den mansûbe vasîsi olmağla vesâyeten ve mezkûr Todori asâleten meclis-i hatîr-i lâzimü’t-tevkīrde mahalle-i mezbûre ahâlîsinden işbu râfi‘ü’l-kitâb Diyani v. Serandi nâm zimmî muvâcehesinde herbiri asâleten ve vesâyeten tav‘an ikrâr ve i‘tirâf edip mezbûr Diyani ile mûrisimiz hâlik-i evvel-i mezkûr Drako’nun hâl-i hayâtında iştirâk-i seviyy üzere mülk ve hakları olup hâlik-i mezbûr Drako hâl-i hayâtında mülkü olan nısf hisse-i şer‘iyyesini şerîki mezbûr Diyani’ye semen-i ma‘lûma bey‘ ve semeni yedinden bi’t-tamâm ahz u kabz eylediği zikrolunan Kumkapı hâricinde vâki‘ hudûdu beynimizde ma‘lûm meyhâne içinde mevcûd olup nısf-ı şâyi‘i mezbûr Diyani’nin nısf-ı şâyi‘-i âharı mûrisimiz hâlik-i mezbûr Drako’nın mülk ve hakkı olan yirmi aded fıçı ve on dört tencere ve altı iskemle ve beş saç ayak ve altı aded ağaç sini ve sâir beynimizde ma‘lûm eşyâdan irs-i şer‘le intikāl eden nısf hisse-i şâyi‘amızı mezbûr Diyani’ye üç yüz seksen riyâlî guruşa bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûrun yüz elli guruşunu mûrisimiz hâlik-i mezbûr Drako hâl-i hayâtında mezbûr Diyani yedinden ahz u kabz edip mâ‘adâsı olan yüz seksen guruşu asâleten ve vesâyetimiz hasebiyle mezbûr Diyani yedinden bi’t-tamâm [42a] ahz u kabz eyledik ba‘de’l-yevm eşyâ-i mezkûrenin semeni olan meblağ-ı mezkûr üç yüz seksen guruşdan mezbûr Diyani zimmetinde bir akçe ve bir habbe hakkımız bâkī kalmadı dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Derviş b. Abdülcelil, el-Hâc Mahmud b. el-Hâc Ömer, Hüseyin Ağa b. Abdullah, Ömer b. Ali, Mehmed b. Yusuf, Osman Beşe çukadâr ve gayruhüm mine’l-[hâzırîn.]