Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 319 Hüküm no: 292 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Ağa b. Mehmed’in Sarı Bayezid mahallesindeki vakıf mülk menzilini karısı Belkıs bt. Abdullah’a iki bin altın ve beş bin guruşa sattığı Fazîletlü efendi hazretlerinin imzâsıyladır. Mahmiye-i İstanbul’da sâbıkā gümrük emîni olan iftihârü’l-emâcid ve’l-ekârim câmi‘u’l-mehâmid ve’l-mekârim Yahya Ağa b. Mehmed meclis-i şer‘-i hatîrde zevce-i muhteremeleri fahrü’l-muhadderât Belkıs Hâtun bt. Abdülvehhâb tarafından ikrâr-ı âtîyi tasdîka vekîl olup vekâleti nehc-i şer‘î üzere sâbite olan umdetü’l-a‘yân kıdvetü’l-erkân Yusuf Ağa b. Mehmed mahzarında ikrâr ve i‘tirâf edip silk-i mülk-i sahîhimde münselik olup arsasının Hızır Bey ve Sarı Bayezid vakıflarına senede dört yüz akçe mukāta‘ası olan mahmiye-i merkūmede Sarı Bayezid mahallesinde vâki‘ bir tarafı Hatîb Mustafa Çelebi mülküne ve bir tarafı İbrahim Çelebi veresesi yedlerinde [olan] menzile ve iki tarafı tarîk-ı âmma müntehî dâhilen ve hâricen büyût-ı adîdeyi müştemil mülk menzilimi cümle hudûd ve hukūk ve müştemilâtı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezbûre Belkıs’a tâmmü’l-vezn ve sahîhu’l-ayâr iki bin altın ve beş bin riyâlî guruşa bey‘ ve teslîm ol dahi iştirâ ve tesellüm ve kabz eyledikden sonra semeni olan meblağ-ı mezbûr iki bin altın ile beş bin riyâlî guruşu tamâmen yedinden ahz u kabz eyledim min ba‘d menzil-i mahdûd-ı mezkûr zevcem mezbûre Belkıs’ın mülk-i müşterâsıdır keyfemâ teşâ tasarruf eylesin dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu cerâ zâlike ve hurrire. Fî evâhiri Şevvâli’l-mükerrem li-sene seb‘a ve sittîn ve elf. Şühûdü’l-hâl: Umdetü’l-müderrisîni’l-kirâm Hüsamzâde Şeyh Mehmed Efendi, Mustafa Efendi el-kādî, Sadi Efendi el-kādî, Mehmed Efendi b. Mehmed el-imâm, Resul Halîfe el-kayyûm, Hüseyin Halîfe el-müezzin, Mustafa b. Ali, Murtaza Bey b. Kasım ve gayruhüm mine’l-[hâzırîn.]