Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 319 Hüküm no: 293 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davud Çelebi b. Osman’ın Mehmed Çelebi b. Bayram’a olan borcunu Seyyid Mehmed Çelebi b. Hamza’da olan alacağından havale ettiği Mahmiye-i İstanbul’da Sekbânbaşı Ya‘kub Ağa mahallesinde sâkin es-Seyyid Mehmed Çelebi b. Hamza nâm kimesne meclis-i şer‘-i şerîf-i lâzimü’t-teşrîfde işbu bâ‘isü’l-kitâb Davud Çelebi b. Osman nâm kimesne mahzarında tav‘an ikrâr ve takrîr-i kelâm edip mezbûr Davud Çelebi’ye benim evsâfı ve cinsi beynimizde ilm-i şer‘î ile ma‘lûm yedinden müşterâ ve makbûz üç re’s câriye semenlerinden bin üç yüz elli kıt‘a riyâlî guruş deynim olup ve mezbûr Davud Çelebi’nin dahi işbu hâzır bi’l-meclis Mehmed Çelebi b. Bayram nâm kimesneye cihet-i karz-ı şer‘îden bin üç yüz elli kıt‘a riyâlî guruş deyni olup üçümüz bir meclisde iken meblağ-ı mezbûru dâyini olan merkūm Mehmed Çelebi’ye benden havâle eyledikde ben dahi havâle-i mezbûreyi kabûl ve meblağ-ı mezbûrun iki yüz elli riyâlini târih-i kitâbdan beş gün tamâmına ve bin yüz riyâlî doksan gün tamâmına değin te’cîle tâlib olduğumda ol dahi te’cîl edip hâlâ cihet-i havâleden mezbûr Mehmed Çelebi’ye bin üç yüz elli kıt‘a riyâlî guruş zimmetimde lâzimü’l-edâ ve vâcibü’l-kazâ deynim vardır dedikde herbiri âharı kelimât-ı meşrûhasında tasdîk ve tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mahmud Beşe b. Mehmed, İshak Bey b. İsmail, Osman Beşe çukadâr, el-Hâc Ca‘fer b. Abdullah ve gayruhüm mine’l-[hâzırîn.]