Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 320 Hüküm no: 294 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçları terekesinden fazla olarak vefat eden Hasan Paşa’nın terekesi üzerine Salih Efendi’nin vasi tayin olunduğu Mahmiye-i İstanbul’da Gedikpaşa kurbünde Emin Bey mahallesi ahâlîsinden olup Trablus Eyaleti’nden ma‘zûl iken düyûnu terekesinden ezyed olduğu hâlde vefât eden Vezîr Hasan Paşa’nın sulbî kebîr oğlu ve hasrân vârisi olan mefharü’l-emâsil Mustafa Bey tereke-i müteveffâ-yı mezbûrdan kasr-ı yed etmekle müteveffâ-yı mezbûrun dâyinleri tereke-i müteveffâ-yı mezbûru semen-i misline bey‘a ve semeninden deynlerini edâya savb-ı şer‘-i enverden bir vasî nasb olunmasına tâlibler olduklarında hâkim-i muvakkı‘-ı sadr-ı kitâb tûbâ lehü ve hüsnü-meâb hazretleri dahi nâkilü hâze’l-kitâb Salih Efendi b. Ebûbekir tereke-i müteveffâ-yı mezbûru semen-i misline bey‘a ve semeninden düyûn-ı müteveffâ-yı mezbûru edâya ve müteveffâ-yı mezbûrun zimem-i nâsda olan hukūkunu da‘vâ ve taleb ve ahz u kabza ve kezâlik düyûnunu îfâya savb-ı şer‘den bi’l-iltimâs vasî nasb ü ta‘yîn etdikde mezbûr Salih Efendi dahi vesâyet-i mezkûreyi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb olundu ve imlâ olunup mezkûr Salih Efendi yedine def‘ ve i‘tâ olundu. Fi’l-yevmi’s-sâbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. eş-Şeyh ( ), Salih Efendi el-kâtib, Mehmed Efendi el-kādî, Ramazan Efendi el-kādî, Mehmed Efendi el-kâtib, İsa Bey b. Ahmed, Mehmed Çelebi b. Haydar ve ayruhüm mine’l-[hâzırîn.]