Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 324 Hüküm no: 299 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü Mustafa Ağa b. Hasan’ın merhum Dilaver Ağa b. Abdullah’ta alacağı olduğu iddiasıyla varisleri aleyhine açtığı davada iddiasını ispat edemediği Mahmiye-i İstanbul’da Vâlide Hamamı kurbünde Ali Paşa-yı Cedîd mahallesinde sâkin umdetü’l-a‘yân Gürci Mustafa Ağa b. Hasan’ın sulbî kebîr oğlu ve tarafından husûs-ı âtîye vekîli olup bi-mâ-hüve nehcü’s-sübût şer‘an vekâleti sâbite olan fahrü’l-akrân Yahya Ağa dîvân-ı ma‘delet-unvânda ma‘kūd mahfil-i kazâda mahmiye-i mezbûrede Avratpazarı kurbünde Canbaziye mahallesi sükkânından iken bundan akdem vefât eden Dilaver Ağa b. Abdullah’ın düyûnunu îfâya ve sâir vesâyâsını tenfîze vasiyy-i muhtârı ve terekesine vâzı‘u’l-yed olduğu bi-hasebi’ş-şer‘ sâbite olan râfi‘u hâze’l-kitâb Receb Efendi b. Ali mahzarında bi’l-vekâle üzerine takrîr-i da‘vâ edip müvekkilim mezbûr Mustafa Ağa târih-i kitâbdan beş sene mukaddem malından mezkûr Dilaver Ağa’ya hayâtında bin kıt‘a riyâlî guruş ikrâz ve teslîm ol dahi iktirâz ve kabz eyledikden sonra meblağ-ı mezbûru müvekkilime edâ etmedin zimmetinde [43a] iken vefât etmeğin hâlâ meblağ-ı mezbûru bi’l-vekâle tereke-i vâfiyyesinden alıverilmesin taleb ederim suâl olunsun dedikde gıbbe’s-suâl vasiyy-i mezbûr cevâbında fi’l-vâki‘ kaziyye vech-i mübeyyen üzere olup lâkin meblağ-ı mezbûru müteveffâ-yı mezbûr hayâtında tamâmen mezbûr Mustafa Ağa’ya teslîm edip hattâ mezkûr Mustafa Ağa merkūm Dilaver Ağa’nın maraz-ı mevtinde ziyâret için menziline geldikde sende hakkım olan meblağ-ı mezbûr bin guruşu tamâmen ahz u kabz edip kıbelinde vechen mine’l-vücûh ve sebeben mine’l-esbâb alacak benim için hak yokdur deyu alâ re’si’l-işhâd ikrâr eylemişdir deyu def‘le mukābile edicek gıbbe’l-istintâk ve’l-inkâr vasiyy-i mezbûr Receb Efendi’den def‘-i meşrûhunu mübeyyine beyyine taleb olundukda udûl-i Müslimînden olup zikrolunan Canbaziye mahallesi sükkânından Müezzin Ali Halîfe b. Sinan ve Yunus Beşe b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu vekîl Yahya Ağa’nın babası ve müvekkili olan Gürci Mustafa Ağa merkūm Dilaver Ağa’nın maraz-ı mevtinde ziyâret için menziline geldikde sende hakkım olan bin guruşu tamâmen alıp kabz edip ba‘de’l-yevm kıbelinde bi-vechin mine’l-vücûh ve sebeben mine’l-esbâb benim için alacak bir akçe ve bir habbe hak yokdur deyu huzûrumuzda ikrâr edip mezbûr Dilaver Ağa dahi tasdîk eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm bî-vech mu‘ârazadan men‘ birle mâ-vaka‘a bi’t-taleb ketb olundu. Fî evâhiri Şevvâli’l-mükerrem li-sene seb‘a ve sittîn ve elf. Şühûdü’l-hâl: İvaz Ağa ser-muhzırân, Kadri Çelebi, Ali Beşe b. ( ), Mehmed Ağa b. ( ), Ahmed Çelebi b. Abdurrahman, Piyale b. Abdullah, Hâcı Dilaver b. Abdullah ve gayruhüm mine’l-[hâzırîn.]