Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 332 Hüküm no: 309 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ömer Ağa b. Yusuf’un Ahmed Ağa b. Mehmed’de olan yedi yüz otuz guruş alacağının varislerine ödenmesi Mahmiye-i İstanbul’da Kiçi Hâtun mahallesi sükkânından iken bundan akdem harbî kefere elinde esîren müteveffâ olan Ömer Ağa b. Yusuf’un verâseti zevceteyn-i metrûketeyni Fâtıma bt. Arslan ve Şehbaz bt. Abdullah nâm hâtunlara ve sulbiye kızı Âişe’ye ve li-ebeveyn kız karındaşı Döndü bt. Yusuf’a münhasıra olduğu şer‘an mütehakkık oldukdan sonra sagīre-i mezbûrenin kıbel-i şer‘den mansûb vasîsi ve mezbûrât Fâtıma ve Şehbaz ve Döndü taraflarından husûs-ı âtîye vekîl olduğu hüccet-i şer‘iyye ile sâbit olan işbu hâmilü’l-kitâb Ali Çelebi b. Şa‘ban mahfil-i kazâda mahmiye-i mezbûrede Mahmudpaşa kurbünde sâkin Ahmed Ağa b. Mehmed mahzarında vekâleten ve vesâyeten üzerine takrîr-i da‘vâ edip mezbûr Ahmed Ağa müteveffâ-yı mezbûrdan hayâtında iki bin kıt‘a riyâlî guruş istikrâz ve kabz eyledikden sonra meblağ-ı mezbûru mezkûr Ömer Ağa kable’l-ahz vefât etmekle verese-i mezbûrûna intikāl etmeğin meblağ-ı mezbûrun bi’d-defe‘ât bin iki yüz riyâlî guruşu verese-i mezbûrûna teslîm edip zimmetinde yedi yüz otuz riyâlî guruş kalmışidi hâlâ meblağ-ı bâkī-i mezbûr yedi yüz otuz riyâlî guruşu vesâyeten ve vekâleten mezbûr Ahmed Ağa’dan taleb ederin suâl olunsun dedikde gıbbe’s-suâl mezbûr Ahmed Ağa cevâbında kaziyye vech-i meşrûh üzere olup meblağ-ı mezbûr yedi yüz otuz riyâlî guruşu müteveffâ-yı mezbûrun hayâtında kethüdâsı ve tarafından meblağ-ı mezbûru kabza vekîli olan Mehmed Çelebi’ye tamâmen teslîm eyledim ol vechile meblağ-ı mezbûrdan zimmetimde bir akçe ve bir habbe kalmamışdır deyu def‘le mukābile edicek gıbbe’l-istintâk ve’l-inkâr mezbûr Ahmed Ağa’dan def‘-i mezbûrunu mübeyyine beyyine taleb olundukda ityân-ı beyyineden için târih-i kitâba gelince yedi def‘a istimhâl ve her def‘ada müddet-i mehl münkaziye olup bir vechile ikāmet-i beyyineye kudreti olmadığından gayrı müvekkilât-ı mezbûrât dahi istihlâf etmeğin meblağ-ı bâkī-i mezbûru mezbûr Ali Çelebi’ye edâya mezbûr Ahmed Ağa’ya tenbîh olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hüseyin Çavuş, Yusuf Çavuş, Şa‘ban b. Aydın, Receb Efendi b. Hâcı Muharrem, Halil Efendi, Mustafa Efendi [b.] Hâcı Ali, Hüseyin Beşe ve gayruhüm mine’l-[hâzırîn.]