Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 333 Hüküm no: 310 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemici Mehmed b. Abdi’nin kefaletlerinden dolayı Marat ve Sara’daki alacağını tahsil etmek üzere Mustafa b. Hüseyin’i vekil tayin ettiği Fi’l-asl medîne-i İzmir’de Musa Bâli mahallesi sâkinlerinden olup mellâh tâifesinden Mehmed b. Abdi nâm kimesne meclis-i şer‘-i hatîr-i lâzimü’t-tevkīrde mahmiye-i İstanbul’da Yemiş İskelesi’nde sâkin pazarcı tâifesinden hâmilü hâze’l-vesîka Mustafa b. Hüseyin muvâcehesinde ikrâr-ı tâm ve takrîr-i kelâm edip gāib ani’l-meclis Safer v. Hobyar nâm Ermeni zimmetinde yedimden müşterâ ve makbûz elâ gözlü açık kaşlı Rusiyyü’l-asl Yusuf nâm şâbb-ı emred semeninden yetmiş dört riyâlî guruş hakkımın otuz yedişer guruşuna işbu hâzırân bi’l-meclis Marat v. Hobyar nâm Ermeni ve Sara bt. Asmad nâm Ermeniyeden herbiri kefîl olup meblağ-ı mezbûru bi-hükmi’l-kefâle edâya târih-i kitâbdan altmış gün tamâmına değin isti‘câl eylediklerinde ben dahi vech-i muharrer üzere te’cîl edip ecel-i mezkûr tamâmında mezbûrân Hobyar ve Sara’nın herbirinden meblağ-ı mezbûru taleb ve ahz u kabz ve bana îsâle ve kabz ve îsâle ve kabz ve îsâl mütevakkıf olduğu umûrun cümlesine mezbûr Mustafa’yı tarafımdan vekîl ve nâib-i menâb nasb eyledim dedikde ol dahi vekâlet-i mezbûreyi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hüseyin Beşe b. Abdullah, Mehmed b. Ramazan, el-Hâc Ca‘fer b. Abdullah, Osman Beşe çukadâr ve gayruhüm mine’l-[hâzırîn.]