Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 334 Hüküm no: 312 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un haksız yere altın bileziğini aldığı iddiasıyla Mehmed Bey b. Ahmed aleyhine açtığı davada kırk guruş üzerine sulh olduğu Fazîletlü efendi hazretlerinin imzâsıyladır. Mahmiye-i İstanbul’da Davudpaşa mahallesinde sâkine Âişe Hâtun bt. ( ) dîvân-ı sa‘âdet-makrûnda ma‘kūd mahfil-i kazâda işbu râfi‘ü’l-kitâb Mehmed Bey b. Ahmed mahzarında üzerine takrîr-i da‘vâ edip mezbûr Mehmed Bey silk-i mülkümde münselik kırk riyâlî guruş kıymetli yirmi dört buçuk miskāl altın bileziğimi târih-i kitâb senesi Şa‘bânı’nın evâilinde bi-gayrı hakkın ahz u kabz etmişidi hâlâ sâlifü’z-zikr bileziği bi-aynihî mezbûr Mehmed Bey’den taleb ederim suâl olunsun dedikde gıbbe’s-suâl mezbûr Mehmed Bey cevâbında müdde‘iye-i mezbûre Âişe’nin sadrî kebîr oğlu işbu hâzır bi’l-meclis Mehmed b. Mehmed zimmetinde evsâfı beynimizde ma‘lûme câriye semeninden doksan bir guruş hakkım olup meblağ-ı mezbûru taleb [ve] da‘vâ eylediğimde mezbûr Mehmed vesâtat-ı muslihîn ile beni kırk riyâlî guruş üzerine sulh eyledikde ben dahi sulh-ı mezbûru kabûl edip lâkin mezbûr Mehmed bedel-i sulh-ı mezbûru edâya iktidârı olmadığı ecilden zimmetinde deyn olmağla müdde‘iye-i mezbûre Âişe Hâtun deyn-i mezkûr için sâlifü’z-zikr bileziği bana def‘ ve teslîm ben dahi ahz u kabz edip ol vechile ol bileziği bi-hakkın aldım deyu def‘le mukābile edicek gıbbe’l-istintâk ve’l-inkâr mezbûr Mehmed Bey’den def‘-i mezbûrunu mübeyyine beyyine taleb olundukda udûl-i Müslimînden olup mahalle-i mezbûreden Mustafa Çavuş b. Mehmed ve Mehmed Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘iye-i mezbûrenin oğlu mezkûr Mehmed zimmetinde câriye bahâsından merkūm Mehmed Bey’e deyni olan doksan bir guruş da‘vâsından kırk guruş üzerine mezbûr Mehmed Bey’i sulh edip bedel-i sulh-ı mezbûru edâya iktidârı olmadığı ecilden sâlifü’z-zikr altın bileziği işbu müdde‘iye-i mezbûre Âişe[’nin] deyn-i mezkûr için mezbûr Mehmed Bey’e def‘ ve teslîm eylediğini şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fî evâhiri Şevvâli’l-mükerrem li-sene seb‘a ve sittîn ve elf. Şühûdü’l-hâl: İvaz Ağa ser-muhzırân, Mehmed Bey, Ali Beşe, Mehmed Ağa, İsa Bey, Ahmed Çelebi ve gayruhüm mine’l-[hâzırîn.]