Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 335 Hüküm no: 313 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzede bt. Kapril’e ölen ebeveyninden intikal eden miras hissesinin vasisi tarafından tahsil edildiği Mahmiye-i İstanbul’da Lanka kurbünde Dülbendci Hüsam mahallesinde sâkine iken hâlike olan Güllü bt. Ağya nâm Ermeniyenin verâseti zevc-i metrûku Kapril v. ( ) nâm Ermeni’ye ve sadriye sagīre kızı Şehzede’ye münhasıra olup kable’l-kısme zevci mezbûr Kapril dahi hâlik olup verâseti sulbiye sagīre kızı mezbûre Şehzede’ye ve vâlidesi Manuş nâm Ermeniye’ye ve li-ebeveyn karındaşları Danyel ve Norsiz nâm Ermenilere münhasıra olduğu ve tashîh-i mes’eleleri bi-tarîkı’l-münâsahati’ş-şer‘iyye yirmi dört sehm i‘tibâr olunup sihâm-ı mezkûreden yirmi bir sehmi sagīre-i mezbûre Şehzede’ye ve bir sehmi vâlidesi mezkûre Manuş’a ve birer sehmi karındaşları mezkûrân Danyel ve Norsiz’e isâbet eylediği zâhir ve mütebeyyin oldukdan sonra sagīre-i mezbûre Şehzede’nin tesviye-i umûruna kıbel-i şer‘den mansûbe vasîsi olan Gülbahar bt. Gülnihani nâm Ermeniye meclis-i şer‘-i hatîr-i lâzimü’t-tevkīrde müte‘âkiben hâlikân olan mezbûrân Güllü ve Kapril’in terekelerine vâzı‘u’l-yed olan mezbûr Norsiz mahzarında bi’l-vesâye ikrâr ve i‘tirâf edip sagīre-i mezbûre Şehzede’ye vâlidesi hâlike-i mezbûreden irs-i şer‘le intikāl eden on bir bin akçe hisse-i şer‘iyyesini ve babası hâlik-i mezbûr Kapril’den intikāl eden iki bin yedi yüz akçe hisse-i şer‘iyyesini cem‘an on üç bin yedi yüz akçe hisse-i şer‘iyyesini vesâyetim hasebiyle mezbûr Norsiz yedinden bi’t-tamâm ahz u kabz eyledim ba‘de’l-yevm sagīre-i mezbûre Şehzede’nin merkūm Norsiz yedinde ve kıbelinde bir akçe ve bir habbe hakkı bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, İsmail Çelebi b. Yunus, Osman Beşe çukadâr ve gayruhüm mine’l-[hâzırîn.]