Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 336 Hüküm no: 314 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemici Mehmed b. Abdi’ye kefaletlerinden dolayı olan borçlarını ödemeleri için Marat ve Sara’ya iki ay süre verildiği Mahmiye-i İstanbul’da Nişancı Paşa kurbünde Soğanağa mahallesi sâkinlerinden Marat v. Hobyar nâm Ermeni ve Sara bt. Ahmad nâm Ermeniye meclis-i şer‘-i hatîrde fi’l-asl medîne-i İzmir’de Musa Bâli mahallesinde olup mellâh tâifesinden bâ‘isü’l-kitâb Mehmed b. Abdi nâm kimesne mahzarında herbiri tav‘an ikrâr ve i‘tirâf edip mahmiye-i mezbûrede mahalle-i mezbûre sükkânından gāib ani’l-meclis Safer v. Hobyar nâm Ermeni’nin merkūm Mehmed’e mülkü olup yedinden iştirâ ve kabz eylediği elâ gözlü açık kaşlı Rusiyyü’l-asl Yusuf nâm şâbb-ı emred semeninden yetmiş dört riyâlî guruş deyni olmağla meblağ-ı mezbûrdan herbirimiz otuz yedişer riyâlî guruşa kefîl olduğumuzda mezbûr Mehmed kefâletimizi kabûl etmeğin meblağ-ı mezbûru bi-hükmi’l-kefâle mezkûr Mehmed’e edâya isti‘câl eylediğimizde ol dahi târih-i kitâbdan altmış gün tamâmına değin ecel-i sahîh ile bizi te’cîl eyledi dediklerinde merkūm Mehmed dahi kefâlet-i mezbûreyi kabûl ve te’cîl-i mezkûru tav‘an ikrâr ve i‘tirâf edicek mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa b. Hüseyin, Hüseyin Beşe b. Abullah, Mehmed b. Ramazan, Osman Beşe çukadâr ve gayruhüm mine’l-[hâzırîn.]