Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 336 Hüküm no: 315 Orijinal metin no: [44b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstemat bt. Andreya’nın kendisini asa ile yaralayan damadı Androça v. İstemat’ın zimmetini ibra ettiği Mahmiye-i İstanbul hısnı ebvâbından Kumkapı kurbünde Çadırcı Ahmed mahallesi sâkinelerinden İstemat bt. Andreya nâm Nasrâniye meclis-i şer‘-i hatîr-i lâzimü’t-tevkīrde damadı olan hâmilü hâze’l-kitâb Androça v. İstemat nâm zimmî mahzarında tav‘an ikrâr ve i‘tirâf edip zevcim olup bundan akdem hâlik olan Çörekçi Sinado nâm zimmînin terekesinden mezbûr Androça ile nizâ‘ ettiğimizde merkūm Androça bi-gayrı hakkın sağ kolumun üzerine amden asâ ile urup beni mecrûh etmişidi el-hâletü hâzihî merkūm Androça’nın zimmetini cerh-i mezbûrun mûcibi da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d damadım merkūm Androça üzerine cerh-i mezkûra müte‘allik bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde mukırre-i mezbûre vech-i meşrûh üzere cârî ve sâdır olan kelimât-ı meşrûhasında merkūm Androça dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: eş-Şeyh İvaz Efendi, Murtaza Bey b. Hüseyin, Mustafa Çelebi b. Mehmed, Mehmed Çavuş b. Abdullah, Ahmed Çavuş b. Mehmed, Osman Beşe çukadâr ve gayruhüm mine’l-[hâzırîn.]